टोमराज मेहता
इनरुवा । सुनसरीको देवानगञ्ज गाउँपालका–२ की सरिता ऋषिदेवको भौचर कार्ड लिएपछि खुसीको सीमा नै रहेन् । ऋषिदेव सुनसरीमा सञ्चालित नेपालमा सबैभन्दा बढी जोखिमा रहेका परिवारका लागि उत्थानशिलता निर्माण र अधारतभूत आवश्यकताको सुनिश्चितता रिजिलियन्स प्लस परियोजनाअन्तर्गत भौचर कार्ड वितरण गरेपछि खुसी भएकी हुन् ।
ऋषिदेवलाई पैसाले मात्रै समान खरिद बिक्री हुन्छ भन्ने थाहा थियो । तर पहिलो पटक भौचर कार्डबाट आफूलाई आवश्यक पर्ने जुनसुकै सामान पनि खरिद गर्न सकिने भएपछि उनी दंग छिन् । उनले आफूलाई कोरोना कहरकोबीचमा प्लान इन्टरनेसनल नेपाल, युकेएडको सहयोगमा ग्रामीण समाज उत्थान केन्द्र ९आरएसडीसी० सुनसरीले कोभिड १९ बाट प्रभावित तथा विपन्न परिवारहरुका लागि भौचर कार्ड वितरण कार्यक्रममा आफूलाई पनि लाभग्राहीको सूचीमा राखेर भौचर कार्ड दिएपछि आफू अभारी भएको बताइन् ।
उनले भौचर कार्डबाट लुगाकपडा, खाद्यान्न, औषधि र निर्माणका सामग्रीसमेत खरिद गर्न सकिने भएकाले आफूलाई राहत मिलेको सुनाइन् । उनले पैसाको कारोबार गर्दा हराउने डर अर्कोतिर कोरोनाको जोखिम बढ्ने खतरा रहेकाले भौचर कार्ड निकै उपयोगी हुने विश्वास व्यक्त गरिन् । उनले दलित समुदायलाई उत्थानका लागि यस्तो कार्यक्रम आवश्यक रहेकोसमेत बताइन् ।
ऋषिदेवजस्तै जानकीदेवी ऋषिदेव पहिलो पटक एटीएम कार्डसहितको भौचर कार्ड पाएपछि आफूलाई निकै राहत भएको बताइन् । उनले भौचर कार्डले आफूहरुको क्रयशक्तिमा योगदान गर्नुको साथै अधारभूत आवश्यकता पूरा गर्न समेत योगदान गर्ने बताइन् ।
त्यस्तै रितादेवी ऋषिदेवले पनि पहिला अरुको बटुका, बोरा, झोला र प्याकेटमा राहत सामग्री पाउँदै आएकोमा यसपटक राहत नभई आफूलाई आवश्यक पर्ने जुनसुकै सामान किन्न सहज हुनेगरी भौचर कार्ड पाएकोमा खुसी व्यक्त गरिन् । उनले अरुलाई एटीएम कार्ड, भीसा कार्ड, एसएमएस सेवा भनेको सुनेकोमा आफूले पहिलो पटक भौचर कार्ड पाएकोमा गर्वको महसुस गरेको सुनाइन् ।
लाभग्राहीलाई कुल २० हजार पाँच सय रुपैयाँ राहतस्वरुप प्रदान गर्ने गरी कार्यक्रम ल्याएकोमा पहिलो चरणमा १० हजार दुई सय ५० रुपैयाँको भौचर कार्ड प्रदान गरेको आरएसडीसीका अध्यक्ष रफुल अन्सारीले बताए ।
आरएसडीसीकी शिक्षा अधिकृत शिखा किरण यादवले जिल्लाको बराहक्षेत्र नगरपालिका–४ का २१० र बराहक्षेत्र–९ का २०८ सहित बराहक्षेत्र र देवानगञ्जमा आठ सय ३४ लाभग्राहीलाई कार्यक्रमले समेटिएको बताइन् ।
उनले कार्यक्रम नितान्त विपन्न, सीमान्कृत र दलित समुदायमा पर्ने मरिक, राम, ऋषिदेव, अपाङ्गता भएका व्यक्ति र विपन्न मुस्लिम समुदाय समेतलाई लक्षित गरेर सञ्चालन गरेको बताइन् ।
यादवका अनुसार सम्बन्धित पालिकामा १२ वटा सूचकांकको अधारमा लाभग्राही छनौट गरिएको र त्यसमा पालिका प्रमुख र उपप्रमुख तथा प्रमुख प्रशासकीय अधिकृत र सम्बन्धित वडाध्यक्षसमेतको रोहबरमा कार्यक्रम गरिएको हो । अति विपन्न अवस्थामा रहेको समुदाय, बेरोजगारी, सुत्केरी महिला, ज्येष्ठ नागरिकलाई प्राथमिकतामा राखेर कार्यक्रम सञ्चालन गरेको र सोहीअनुसार भौचर कार्डसमेत वितरण गरिएको उनले बताइन् ।
यसैबीच आरएसडीसीले सुनसरीको देवानगञ्ज गाउँपालिका–२ र ४ नम्बर वडाका २०८ र २०८ गरी कुल ४१६ जना पीडित, दलित र अपाङ्गता भएकालाई बन्दाबन्दीको बीचमा राहत वितरण गरेको जनाएको छ ।
