आप्रवासी कामदार दिवसमा अन्तरक्रिया र दीप प्रज्वलन

इनरुवा । सुनसरी सदरमुकाम इनरुवामा २१ औं अन्तरराष्ट्रिय आप्रवासी कामदार दिवसको अवसरमा सरोकारवालाहरुसँग अन्तरक्रिया कार्यक्रम सम्पन्न भएको छ । सामुदायिक विकास संस्था (सिडिओ ) सुनसरी, इनरुवा नगरपालिका र सामी हेल्भेटासको संयोजनमा आप्रवासी कामदार दिवसको अवसरमा अन्तरक्रिया कार्यक्रम सम्पन्न भएको हो ।

‘स्वदेशमै रोजगारी गरौं, बैदेशिक रोजगारीमा जाने नै भए सही सूचना लिएर र सीप सिकेर मात्र जाऔं’ भन्ने मूल नाराका साथ सरोकारवालाहरुसँग अन्तरक्रिया कार्यक्रम सम्पन्न भएको हो ।

कार्यक्रममा सरोकारबालाहरुले स्वदेश्मै रोजगार सृजना गर्न र बैदेशिक रोजगारलाई ब्यवस्थित, मर्यादित र सुरक्षित गर्नुपर्नेमा जोड दिएका छन् ।

सुनसरी जिल्लामा बैदेशिक रोजगारीलाई सुरक्षित, मर्यादित र भरपर्दो बनाउनको लागी सुरक्षित आप्रवासन परियोजना सामिले काम गर्दै आएकोले सरोकारवालाहरुले पनि भूमिका खेल्नुपर्नेमा नागरिक समाज सुनसरीका अध्यक्ष पुरुषोत्म घिमिरेले बताए ।

सुरक्षित आप्रवासन सामी परियोजनाका कार्यक्रम संयोजक धिरज भट्टराईले सामी परियोजनाको उद्देश्य, लक्ष्य र उपलब्धी बारेमा सहभागिहरुलाई जानकारी गराएको थियो ।

२१ औं अन्तरराष्ट्रिय आप्रवासी कामदार दिवसको अवसरमा शुक्रवार साँझपख लोकतान्त्रिक चौकमा दीप प्रज्वलन गरी मनाइएको छ ।

बैदेशिक रोजगारका क्रममा मृत्यु भएका ब्यक्तिहरुको सम्झना गर्दै मैनबत्ती बालेर दीप प्रज्वलन गरेको कार्यक्रम संयोजक भट्टराईले बताएका छन् ।

बैदेशिक रोजगारका क्रममा ज्यान गुमाएका इनरुवा नगरपालिकाका दुई जनाका आफन्त दिपेन्द्र साह र श्रवण मण्डलले संयुक्त रुपमा मैनवत्ति बालेर दीप प्रज्वलन गरेका थिए ।

कार्यक्रममा वैदेशिक रोजगारमा गई फर्किएका व्यक्ति सहित रोजगार प्रवद्र्धन र अधिकार प्राप्ती सहितको कानुनी लडाईमा अग्रसर रहँदै आएका व्यक्ति तथा संघ संस्था आवद्ध प्रमुख तथा प्रतिनिधिहरु समेतको सहभागिता रहेको थियो ।

आप्रवासी स्रोत केन्द्र सुनसरीबाट २०१५ जनवरी देखि २०१९ जुलाई १५ सम्मको अवधिमा १ हजार ६१ मुद्धा हेरिएको छ । जसमध्ये ७ सय वटा समाधान भएका छन् ।

सामी सुनसरीले २ सय २० जनाको रकम फिर्ता गराइएको समेत जनाएको छ । क्षतिपूर्ति १ सय ८४ जनालाई दिलाउन सफल भएको र १ सय ३८ जनाको पासपोर्ट फिर्ता गराइएको जनाएको छ ।

परियोजनाका संयोजक भट्टराईका अनुसार काम र तलव फरक परेका ८७ जनाको सवालमा काम गरिएको छ । अलपत्र परेका ७६ जनाको उद्दार गरिदा ३० जना मृतक परिवारको हकमा क्षतिपूर्ति दिलाउन सफल भएको उनले बताए ।

पछिल्लो आर्थिक वर्षमा सामी सुनसरी मार्फत संचालित आप्रवासी स्रोत केन्द्र मार्फत ३६ हजार २ सय ९७ जनाले व्यक्तिगत परामर्श लिएका छन् ।

कार्यक्रममा प्रदेश सांसद ज्योति सुब्बा , उद्योग वाणिज्य संघ इनरुवाका अध्यक्ष बीरेन्द्र साह, नागरिक समाजका अगुवा पुरुषोत्तम घिमिरे, हाम्रो सहयात्रा मञ्चकी अध्यक्ष विनीता दाहाल अधिकारकर्मी पुष्प पोखरेल, नेपाली कांग्रेसका युवा नेता दिनेश मण्डल, अधिकारीकर्मी, संचारकर्मी लगायतको उपस्थिति रहेको थियो ।