पवन रौनियार
लौकही । सुनसरीको कोसी गाउँपालिकाको लौकहीमा जनता समाजवादी पार्टी कोसी गाउँपालिका कार्यसमितिले विरोध र्याली प्रदर्शन गरेको छ । जनता समाजवादी पार्टीको पूर्वघोषित कार्यक्रमअनुसार आइतबार लौकहीमा विरोध र्याली प्रदर्शन गरेको हो ।
वर्तमान राष्ट्रपति विद्यादेवी भण्डारी र प्रधानमन्त्री केपी शर्मा ओलीले गरेको संसद् विघटनलाई पुर्नस्थापित गर्नुपर्ने माग राख्दै लौकही बजार परिक्रमा गरेको र्याली कोणसभामा परिणत भएको थियो ।
राष्ट्रपति विद्यादेवी भण्डारी र प्रधानमन्त्री केपी शर्मा ओलीको विरुद्ध विभिन्न नाराबाजी गर्दै राष्ट्रपति विद्यादेवी भण्डारी र प्रधानमन्त्री केपी शर्मा ओलीले राजीनामा दिनुपर्ने माग गर्दै विरोध र्याली प्रदर्शन गरेका थिए।
कोणसभालाई सम्बोधन गर्दै जसपाका नेता देवकृष्ण यादव भनिने गोवर्धनले जसपा नेपालले संविधान संशोधन गर्नुपर्ने माग राख्दै आएको बेला वर्तमान राष्ट्रपति विद्यादेवी भण्डारी र प्रधानमन्त्री केपी शर्मा ओलीले संसद् विघटन गर्नु गलत कार्य भएकाले विरोध गरेको बताए ।
लोकतान्त्रिक मूल्य मान्यतालाई खत्तम गरेको उनले बताउँदै मुलुकमा जनता जाग्नुपर्ने अवस्था आएकाले एकजुट हुनुको विकल्प नरहेकोसमेत बताए ।
संविधान संशोधन हुने पूर्ण विश्वासका साथ मधेसी, जनजाति, आदिवासी, मुस्लिम, दलितलगायतका विषयमा जनता समाजवादी पार्टीले अधिकार प्राप्तिका लागि फेरि आन्दोलनमा होमिएको यादवको भनाइ छ ।
जनता समाजवादी पार्टी सुनसरीका अर्का जिल्ला यध्यक्ष रामनारायण यादवले संसद् पुनर्बहाली नगरेसम्म जसपाको आन्दोलन जारी रहने चेतावनी दिएका छन् ।
जसपाले मुलुकभर संसद् विघटनको विषयलाई लिएर आन्दोलन गरिरहेको हुँदा अलोकतान्त्रिक र असंवैधानिक कार्यप्रति घोर आपत्ति जनाएको छ ।
