पवन रौनियार
लौकही । सुनसरीको कोसी क्षेत्रमा एकपछि अर्को जंगली जनावरको आतंक र आक्रमण बढेपछि स्थानीयहरु आन्दोलित बनेका छन् ।
पुस महिनामा मात्रै दुईजनाको ज्यान लिने गरी हात्ती आक्रमण भएको र दर्जनभन्दा बढी घरमा क्षति गर्नुका साथै बालीमा नोक्सानी गरेकाले स्थानीयहरु संघर्ष समिति बनाएर आन्दोलनमा उत्रिएका हुन् ।
कोसी गाउँपालिकाका कोसीटप्पु वन्यजन्तु आरक्ष पीडितहरुको भेलाले जंगली जनावर पीडित संघर्ष समिति निर्माण गर्दै आन्दोलनको घोषणा गरेका हुन् ।
पछिल्लो पटक कोसी–५का मोती कामतको हात्ती आक्रमणमा ज्यान गएपछि समिति निर्माण गरेर आन्दोलनको कार्यक्रम घोषणा गरेका हुन् ।
कोसी गाउँपालिकामा जंगली जनावर पीडितहरुले लामो समयदेखि उठाउँदै आएको समस्याहरुलाई सम्बोधन नगरेपछि आन्दोलनको घोषणा गरेका हुन् ।
सरोकारवाला निकायलाई पटक–पटक ज्ञापनपत्र बुझाए पनि कुनै वास्ता नगरेकाले संघर्ष समितिको सोमबारको भेलाले आन्दोलनको घोषणा गरेको हो ।
कोसी गाउँपालिकाको नहरचोकमा सयौंको संख्यामा उपस्थित भएका सर्वसाधारणहरुको भेलाले विभिन्न नाराबाजी गर्दै कोसीटप्पु वन्यजन्तु आरक्षका प्रमुख चन्द्रशेखर चौधरीलाई ज्ञापनपत्र बुझाएका छन् ।
संघर्ष समितिले ज्ञापनपत्र बुझाएपछि पुनः नहर चोकका सर्वसाधारणहरु विभिन्न नाराबाजी गर्दै कोणसभाको आयोजना गरेका थिए । कोसी गाउँपालिकाका अध्यक्ष ऐयुब अन्सारीले कोणसभालाई सम्बोधन गर्दै संघर्ष समितिले घोषणा गरेको आन्दोलनलाई पूर्ण समर्थन गरेको बताए ।
अध्यक्ष अन्सारीले अनुशासनमा रहेर आन्दोलन गर्नुपर्नेमा जोड दिएका थिए । यस समस्यालाई समाधानका लागि आफूबाट पूर्ण सहयोग हुने बताउँदै अन्सारीले प्रत्येक घरबाट सहभागी हुनुपर्ने बताए ।
आन्दोलनबाटै संघीय सरकारलाई घच्घचाउने चेतावनी दिँदै अन्सारीले नटेरे थप आन्दोलनको घोषणा गर्नेसमेत बताएका छन् । संघीय र प्रदेश सरकारले चासो लिनुपर्ने बताए ।
हात्तीबाट पीडित भएका सर्वसाधारण र कोसी गाउँपालिकाका सबै वडाबाट सहभागी भई आन्दोलनलाई सफल बनाउन आवश्यक रहेको उनले बताए ।
जंगली जनावर पीडित संघर्ष समितिका अध्यक्ष पञ्चनारायण मण्डलले पीडितहरुको अधिकार प्राप्तिका लागि आन्दोलन सुरु गर्ने बताएका छन् ।
ज्ञापनपत्र बुझाएकाले मागलाई सम्बोधन गर्न आवश्यक रहेको हुँदा माग सम्बोधन नभए किसान आन्दोलन सुरु गर्ने चेतावनी दिएका छन् । हात्तीको विज्ञ टोलीले गरेको निर्णय कार्वान्वयन नभएकाले फेरि आन्दोलनको घोषणा गर्नुपरेको बताए ।
कोसीटप्पु वन्यजन्तु आरक्षबाट निस्केको मकुना हात्तीको आक्रमणबाट मसिर २९ गते कोसी गापा–६ का प्रमोद यादव र पुस १३ गते कोसी–५ का मोती कामेतको निधन भएपछि कोसीका स्थानीयहरुले सुरक्षाको प्रत्याभूतिको महसुस नभएको भन्दै आन्दोलनको घोषणा गरेका हुन् ।
आरक्षबाट निस्केका हात्तीको आक्रमणबाट २२ जना भन्दा बढीको मृत्यु भइसकेको छ । संघर्ष समितिले सोमबार कोसीटप्पु वन्यजन्तु आरक्षको कार्यालयमार्फत् राष्ट्रिय निकुञ्ज तथा वन्यजन्तु संरक्षण विभाग काठमाडौँमा ज्ञापनपत्र पठाएको छ ।
यसैगरी पुस २२ गते जिल्ला प्रशासन कार्यालय सुनसरीमार्फत प्रधानमन्त्रीको कार्यालय, गृह मन्त्रालय र वन मन्त्रीलाई ज्ञापनपत्र पठाउने कार्यक्रम रहेको छ । पुस २७ गते सुनसरी सदरमुकाम इनरुवामा किसान जुलुस गरी सशक्त आन्दोलनको घोषणा गर्ने कार्यक्रम रहेको संघर्ष समितिले जनाएको छ ।
