इनरुवा । जिल्ला प्रहरी कार्यालय सुनसरीले ठूलो परिमाणको गाँजा बरामद गरेको छ । ठूलो परिमाणको गाँजा एक गाडीमा रहेको सूचनाको अधारमा प्रहरीले इनरुवाको बलाहा नहर चौकमा गाडीलाई नियन्त्रणमा लिई दुई सय ५० केजी गाँजा बरामद गरेको सुनसरी प्रहरीले जनाएको छ ।
पत्रकार सम्मेलनको आयोजना गरी दुई सय ५० केजी गाँजा सहित दुई जनालाई प्रहरीले सार्वजनिक गरेको छ ।
सुनसरीको इनरुवा नगरपालिका–१ बलाहा नजिक सहायक नहरईनरुवा दुहबी सडक खण्डबाट को. १ च ९८५२ नम्बरको स्कार्पियो गाडीमा बाहिरबाट प्लाष्टिक तथा बोराले प्याकिङ गरी कपडाको रोल जस्तो देखिने गरी ९ (नौ) वटा बोरामा २ सय ५० के.जी. गाँजा सहित २ जना व्यक्रिलाई नियन्त्रणमा लिएको हो ।
धनकुटा जिल्लाको सिमावर्ति क्षेत्रबाट ठूलो परिमाणमा तयारी गाँजा निकासी भई सुनसरी र मोरङको बाटो हुँदै भारत तर्फ जाँदै गरेको सूचनाका आधारमा वराह क्षेत्रको चतरा देखी पछ्याउदै गर्दा उक्त स्थानमा पक्राउ गर्न सफल भएको सुनसरीका प्रहरी प्रमुख कमल थापाले बताएका छन् ।
ईलाका प्रहरी कार्यालय महेन्द्रनगरका प्रहरी निरीक्षकको टोलीले चेक गर्ने क्रममा ब्यारिकेट लडाएर भागेपछी, चेकिङलाई निरन्तरता दिदै अर्को टोलीले उक्त गाडीलाई फलो गरिएको थियो ।
भागेको गाडीलाई पक्राउका लागी जिल्ला प्रहरी कार्यालय सुनसरीबाट प्रहरी उपरीक्षको टोली नै परिचालित भएको थियो र सोही टोलीले बलाहा नजिक सहायक नहरईनरुवा दुहबी सडक खण्डबाट नियन्त्रणमा लिएको हो । प्रहरीले ब्यारिकेट तोडेर भाग्दा उक्त गाडी माथि प्रहरीले एक फायर समेत गर्दा नियन्त्रण लिन नसकेपछि प्रहरीले पछ्याउँदै जाँदा इनरुवाको बलाहा नहर चौकमा नियन्त्रण लिन सफल भएको प्रहरी प्रमुख थापाले बताए ।
उक्त गाडी भाग्ने क्रममा को. १ब २४३६ र को. १ ब २१०५ नम्बरको मोटरसाईकललाई समेत पूर्ण रुपमा क्षति पुर्या्एको र ब्यारिकेटलाई क्षति गरी फरार हुने क्रममा ब्यारिकेटले ठक्कर लागी चतरा कोशी पुल नजिक चेकिङमा खटिएका प्रहरी जवान उदय राई घाईते भएका छन् ।
गाडी संगै चालक भोजपुर हतुवागढी गा.पा ९ बस्ने बर्ष २७ को अर्जुन खड्का र गाडीमा सवार रहेका धरान उपमहानगरपालिका–१ बस्ने बर्ष २६ को ज्याक्सन श्रेष्ठलाई पक्राउ गरिएको छ ।
गाडिमा रहेको दुई सय ५० केजी गाँजा सहित पक्राउ परेका अर्जुन खड्काको साथबाट नगद रु.१ लाख ५४ हजार र उक्त नियन्त्रणमा लिएको गाडीको सिट मुनिबाट धारिलो हतियार खुकुरी २ थानसमेत बरामद गरिएको छ ।
पक्राउ परेका दुई जनालाई लागु औषध नियन्त्रण ऐन २०३३ बमोजिम सुनसरी जिल्ला अदालतबाट आठ दिन म्याद थप गरी अनुसन्धान भईरहेको सुनसरी प्रहरीले जनाएको छ ।
भिडियो :
