काठमाडौँ । काठमाडौं उपत्यकको ट्राफिक व्यवस्थापन बिहानैदेखि अस्तव्यस्त बनेको छ । नेपाल कम्युनिस्ट पार्टी (नेकपा) प्रचण्ड(नेपाल समूहले गर्न लागेको प्रदर्शन र विरोध सभाका कारण ट्राफिक व्यवस्थापन अस्तव्यस्त बनेको हो ।
विरोध सभाका लागि विभिन्न ठाउँबाट जुलुस सुरुभएको र प्रदर्शनीमार्गस्थित मुख्य सडकमा मञ्च बनाइएकोले यातायात प्रभावित अवस्थामा छ । यातायात आवागमनलाई व्यवस्थित गर्ने प्रयासमा बिहानैदेखि डाइभर्सन सुरु गरिएको महानगरीय ट्राफिक प्रहरी महाशाखाका प्रवक्ता एसपी श्यामकृष्ण अधिकारीले जानकारी दिए ।
ठूला गाडीहरुलाई चक्रपथभित्र प्रवेश गर्न पूर्णरुपमा रोक लगाइएको छ भने ठूला गाडीहरुलाई चक्रपथ वरिपरि नै रोकिएको छ । ‘जुलुस सुरुहुने सबै सडकमा ठूला तथा सार्वजनिक सवारीलाई प्रवेश दिएका छैनौँ,’ अधिकारीले भने, ‘रिङ रोडभित्र ठूला सवारीलाई प्रवेश दिनसक्ने अवस्था छैन ।’
कालीमाटी, थापाथली, लैनचौर, रत्नपार्क, पुतलीसडक क्षेत्रतिर आउने साना गाडीहरुलाई पनि डाइभर्सन गरिएको छ । यस्तै नागपोखरी, जयनेपाल हलको बाटो भएर दरबारमार्ग हँदै रत्नपार्क जाने सवारीसाधनलाई दरबारमार्गको प्रहरी वृत्तबाट प्रवेशमा रोक लगाइएको प्रवक्ता अधिकारीले बताए ।
मुख्य सडकबाट सवारीसाधन डाइभर्ट गर्दा वैकल्पिक सडकहरुमासमेत चाप बढेको छ। जसका कारण यात्रुलाई सास्ती भएको छ भने सवारी आवागमन प्रभावित बनेको छ ।
