मुस्ताक आलम
लौकही । बाँध भत्किएपछि मरुभूमि बन्न पुगेको सुनसरीको कोसी गाउँपालिकाअन्तर्गतको बलौटे जग्गा अहिले त्यहाँका किसानहरुका लागि कागती खेतीको सफल उत्पादन केन्द्रको रुपमा फस्टाउन थालेको छ ।
२०६५ साल भदौ २ गतेको गएको भीषण बाढीबाट सुनसरीको साविक श्रीपुर, हरिपुर, पश्चिम कुशाहा र लौकही गरी चारवटा गाविसमा लगभग ३५ हजार घरपरिवारविहीन भएका थिए । अहिले खास गरेर कोसी गाउँपालिका वडा नम्बर ५ को हजारौं बिघा जग्गा बाँझो भएको छ ।
अहिले सरकारले कृषिलाई उकास्नका लागि प्रधानमन्त्री कृषि आधुनिकीकरण परियोजना कार्यक्रम ल्याएको छ । सो कृषि आधुनिकीकरण परियोजनालाई अहिले गाउँपालिकाले पकेट क्षेत्रको रूपमा कागती खेतिलाई बिकास गर्नु पर्छ भन्ने धारणा लिएको हो । प्रधानमन्त्री कृषि आधुनिकीकरण सुनसरीको विभिन्न पालिकाहरुमा यो कार्यक्रम लागू भएको कार्यक्रम संयोजक दिपेन्द्र पोख्रेलले जानकारी दिएको छ ।
उक्त कागती बाली सञ्चालनका लागि बिहीबार कोसी गाउँपालिका र स्थानीय कृषकहरुसँग विभिन्न सर्तमा सम्झौता भएको छ । एक पालिका एक पकेट क्षेत्रको रूपमा विस्तार गर्न पर्ने नारासहितका साथ ४० बिघा जग्गालाई लेबलिङ गरी एकीकृत रूपमा कागती खेती गर्ने भनी त्रिपक्षीय बैठक बसी निर्णय गरिएको हो ।
कागती नमुनाको रुपमा रहेको स्थानीय किसान असगर अली र सहाबुद्दिनको अहिले दुई बिघामा रहेको छ र कोसी गाउँपालिकाले बिस्तार गर्न गइरहेको कागती जोन अहिले सो क्षेत्र का २० जना किसानहरु इच्छुक भएका छन् ।
कोसी गाउँपालिका–५ का असगर अलीले दुई बिघामा कागती खेती गरेका छन् । उनले सुरु गरेको कागती खेती दुई बिघामा राम्रो व्यवस्थापन गरेर विस्तार गरेका हुन् ।
गाउँपालिकामा हजारौँ बिघा जग्गा बाँझो जमिनलाई उत्पादनमुखी बनाउन गाउँपालिकाले कृषि ज्ञान केन्द्रसँगको सहकार्य पकेट क्षेत्र सुनसरी जिल्लाका प्रमुखसहितको टोलीसँग परामर्श लिएर आगाडि बढेको देखिएको छ ।
अहिलेको लागि ४० बिघालाई एकीकृत गरेर किसानहरुलाई व्यावसायिक रूपमा कागती खेतीतिर आकर्षित गराउने कोसी गाउँपालिकाका अध्यक्ष ऐयुब अन्सारीले बताएका छन् ।
अन्सारीले बलौटे जग्गालाई सदुपयोग गर्न कागती खेती नै उपयुक्त भएकोले यस क्षेत्रका किसानहरुलाई कागती खेती गर्न प्रोत्साहन गर्न लागेको बताए ।
एक वर्षअघि कोसी गाउँपालिकाका जनप्रतिनिधिहरुले भारतको विभिन्न ठाउँमा भ्रमण गरेर आएपछि बलौटे जग्गामा कागती खेती नै उपयुक्त हुने ठहर गरेपछि अहिले त्यहाँका किसानहरु कागती खेतीतर्फ आकर्षित बनेका हुन् ।
कागती खेतीबाट पनि मग्नय आम्दानी गर्न सकिने भएपछि अहिले कोसीका किसानहरु कागती तर्फ आकर्षित भएकाहुन् ।
