धरान । नेपाल पत्रकार महासङ्घको २६औँ महाधिवेसनअन्तर्गत आज देशभर एकैसाथ निर्वाचन हुँदै छ ।
नेतृत्व चुन्न देशैभर एकसाथ प्रत्यक्ष निर्वाचन प्रणालीमार्फत निर्वाचन गर्न लागिएको यो पहिलो हो ।
केन्द्रीय, प्रदेश, जिल्ला र सम्बन्धित शाखाहरूको नेतृत्व चयनका लागि महासङ्घले एकसाथ मतदानको व्यवस्था मिलाएको छ ।
देशभरका करिब एक सय मतदान केन्द्रमा महासङ्घका १३ हजार सदस्यले मत दिने व्यवस्था मिलाइएको केन्द्रीय निर्वाचन समितिका संयोजक कपिल काफ्ले जानकारी दिए ।
महासङ्घको नेतृत्वमा पुग्न विभिन्न राजनीतिक दलनिकट पत्रकारका सङ्गठनहरूले प्यानल बनाएर चुनावी मैदानमा होमिएका छन् । यस्तो प्यानल केन्द्रदेखि प्रदेश, जिल्ला हुँदै शाखाहरूसम्म बनेको छ ।
अध्यक्षदेखि सदस्यसम्म विभिन्न पदका लागि हुने निर्वाचनमा कतिपय स्थानमा भने निर्विरोध घोषणा पनि गरिसकिएको छ ।
महासङ्घको केन्द्रीय समितिको ४९ पदाधिकारीका लागि मतदान हुनेछ भने प्रदेश र शाखाहरूले पनि आ–आफ्ना समिति निर्माणका लागि निर्वाचन गराउने छन् । निर्वाचनमा १३ हजार १२२ मतदाताले मताधिकार प्रयोग गर्न पाउने छन् ।
महासङ्घको नयाँ नेतृत्वका लागि विपुल पोखरेल र निर्मला शर्मा प्यानलसहित चुनावी मैदानमा रहँदा गजेन्द्र बुढाथोकी महासङ्घमा शुद्धीकरणको नारासहित चुनावी प्रतिस्पर्धामा छन् । उम्मेदवारहरूले श्रमजीवी पत्रकारको पेसागत सुरक्षा र पत्रकार महासङ्घको शुद्धीकरणलाई मुख्य मुद्दा बनाएका छन् ।
प्रेस युनियन, प्रेस सेन्टर र प्रेस चौतारी (माधव नेपाल समूह) सहित ११ वटा सङ्गठनको साझा उम्मेदवारका रूपमा पोखरेल, प्रेस चौतारी (ओली समूह) सहितको गठबन्धनको उम्मेदवारको रूपमा शर्मा र स्वतन्त्र रूपमा अध्यक्ष पदका लागि बुढाथोकी मैदानमा चुनावी मैदानमा छन् ।
यस्तै, वरिष्ठ उपाध्यक्षमा माधव नेपाल र रमेश विष्ट प्रतिस्पर्धामा रहँदा समावेशी उपाध्यक्षमा उदय जिएम, अवधेश झा र मोहनकुमार सिंह चुनावी प्रतिस्पर्धामा छन् । महिला उपाध्यक्षमा दाना केसी र बाला अधिकारी प्रतिस्पर्धा गर्दा महासचिवमा रोशन पुरी, बालकृष्ण बस्नेत र सुबोध गौतम पनि भिड्दै छन् ।
बिहान ९ बजेदेखि अपराह्न ५ बजेसम्म मत दिने व्यवस्था मिलाइएको छ भने मतदानका लागि कुनै आधिकारिक परिचय पत्र वा नागरिकता चाहिने व्यवस्था गरिएको नेपाल पत्रकार महासङ्घ केन्द्रीय समितिले जनाएको छ ।
