इनरुवा÷सुनसरीको छिमेकी जिल्ला मोरङ र जिल्लाका नेपाल भारतको सीमावर्ती क्षेत्रबाट बढ्दै गएको आवगमनका कारण सदरमुकाम इनरुवा कोरोनाको थ्रेटमा परेको जिल्ला स्वास्थ्य कार्यालय सुनसरीका प्रमुख सागर प्रसाईले बताएका छन् ।
सोमबार राति प्रतिक्षण दैनिकसँग कुरा गर्दै प्रसाईले दोश्रो चरणको कोरोना लहरमा हालसम्म जिल्लाभित्र चारजनाले ज्यान गुमाइसकेका छन् भने ६२ जना संक्रमित उपचारार्थ छन् । सुनसरीसँग जोडिएको नेपाल भारत सीमा क्षेत्रबाट अवैध रुपमा भइरहेको भारतीयको प्रवेशले थप समस्या उत्पन्न गराएको प्रसाईको भनाइ छ ।
वर्तमान अवस्थामा आसपासका जिल्लामा देखिएको कोरोनाको प्रभावले सुनसरी जिल्लालाई समेत कोरोनाको थ्रेटमा राखेकोले यसका लागि पूर्व तयारी तत्काल आवश्यक रहेको उनले थपे । छिमेकी जिल्ला मोरङमा देखिएको अवस्थाले ह्वात्तै सुनसरीमा पनि संक्रमितको संख्या बढ्न सक्ने खतरा बढ्दै गएको बताउँदै प्रसाईले यसतर्फ सबै सरोकारवालाहरु समयमै सजग हुनुपर्ने समेत सुझाए ।
यसैबीच जिल्ला प्रशासन कार्यालय सुनसरीमा हिजो आकस्मिक बैठक बस्दै सुनसरी प्रशासनले बिभिन्न निर्णयहरु गरेको छ । डिसिसिएमसी बैठकले सुनसरीका सबै पालिकालाई तीन दिनभित्र आइसोलेसन तयार गर्न जिल्ला कोभिड संकट व्यवस्थापन केन्द्रले निर्देशन दिएको छ । सोमबार जिल्ला प्रशासन कार्यालय सुनसरीमा प्रमुख जिल्ला अधिकारी उमेशकुमार ढकालको अध्यक्षतामा बसेको डिसिसिएमसीको बैठकले आइसोलेसन सेन्टरहरु बनाउन निर्देशन दिएको हो ।
देशभर कोरोना भाइरसको दोस्रो भेरियन्ट दिन प्रतिदिन बढ्दै गएकाले यसले जिल्लामा पनि महामारीको रुप लिन सक्ने कुरालाई मध्यनजर गर्दै आइसोलेसन सेन्टरलाई तयारी अवस्थामा राख्न निर्देशन गरिएको प्रेस विज्ञप्तिमार्फत् जिल्ला प्रशासन कार्यालय सुनसरीले जानकारी दिएको छ । सुनसरीका स्थानीय तहका प्रमुख तथा प्रतिनिधिहरुको उपस्थितिमा भएको बैठकले विद्यालय पनि बन्द गर्ने निर्णय गरेको छ ।
जिल्लामा सञ्चालित सम्पूर्ण विद्यालय, कलेज, ट्युसन सेन्टर, तालिम केन्द्र पनि भोलि अर्थात् मंगलबारबाट बन्द गर्न निर्देशन दिएको छ । यसका साथै कक्षाहरु सञ्चालन गर्नु परे शिक्षा मन्त्रालयले जारी गरेको वैकल्पिक शिक्षण प्रणाली अपनाई पठनपाठन गर्न पनि डिसिसिएमसीको बैठकले निर्णय गरेको छ ।
सरकारी तथा निजी कार्यालयहरु तथा बैंक तथा बित्तीय संस्थामा सामाजिक दूरी कायम गरेर र उच्च स्वास्थ्य सुरक्षाका मापदण्ड पालना गरेर सेवा प्रवाह गर्न पनि डिसिसिएमसीले निर्देशन दिएको छ । यसका साथै स्थानीय तहमा लाग्ने हाट बजारलाई निरुत्साहित गर्न पनि अनुरोध गरेको छ । त्यसका लागि स्थानीय तहले नियम गर्न डिसिसिएमसीले अनुरोध गरेको छ ।
कोरोना फैलन नदिन तत्काल जिल्ला प्रशासन कार्यालयका प्रशासकीय अधिकृतको संयोजकत्वमा जिल्ला प्रहरी कार्यालय, सशस्त्र प्रहरी वल नेपाल र राष्ट्रिय अुनसन्धान जिल्ला कार्यालयका अधिकृत रहने गरी अनुगमन समिति गठन गर्ने पनि बैठकले निर्णय गरेको छ ।
साथै जिल्लामा सञ्चालनमा रहेका उद्योग तथा कलकारखानाले आफ्नो कार्यालयमा कार्यरत कर्मचारीको १० प्रतिशत रहने गरी क्वारेन्टिन र आइसोलेसन सेन्टर बनाउन पनि निर्देशन गरेको छ ।
धार्मिक मठ मन्दिरमा आनावश्यक भिडभाड हुन नदिन पनि बैठकले निर्णय गरेको छ । साथै सोको नियमन र अनुगमन गर्न स्थानीय तहलाई अनुरोध गर्ने बताएको छ ।
