भण्टाबारी । सशस्त्र प्रहरी बल नेपाल प्रदेश नम्बर १ का प्रमुख डिआइजी वंषीराज दाहालले सीमा क्षेत्रमा कडाइ गर्न निर्देशन दिएका छन् । सुनसरी जिल्लाको भारतसँग सीमा जोडिएका विभिन्न बिओपीहरुको स्थलगत अनुगमन गर्दै डिआइजी दाहालले सो निर्देशन दिएका हुन ।
जिल्लाका विभिन्न सीमानाकाको अनुगमन गर्दै उनले सीमावर्ती क्षेत्रको वस्तुस्थितिका बारेमा जानकारीसमेत लिएका थिए ।
भारतको बिहार राज्यमा कोरोना संक्रमण तीव्र गतिमा फैलिरहेको अवस्थामा सीमा क्षेत्रमा तैनाथ सुरक्षाकर्मीको स्वास्थ्य अवस्थाका बारेमा समेत चासो राख्दै डीआईजी दाहालले आफू सुरक्षित भएर संक्रमण समुदायस्तरमा फैलिन बाट रोक्न आवतजावतमा थप कडाइ गर्न निर्देशन दिए ।
सीमावर्ती क्षेत्रको अनुगमनसँगै उनले कोरोना संक्रमणका असर तथा सम्भावित हानी नोक्सानी एवं नागरिक र सुरक्षाकर्मीले अवलम्बन गर्नुपर्ने स्वास्थ्य सुरक्षाका उपायहरुका बारेमा समुदायस्तरमा जानकारी गराउनसमेत सशस्त्र प्रहरीलाई निर्देशन दिए ।
यस महामारीको बखत सर्वसाधारणसँगै अन्य सुरक्षा निकायहरु एवं छिमेकी मुलुकका समकक्षी सुरक्षाकर्मीहरुसँग निरन्तर समन्वय र आवश्यक सहकार्य गर्दै जनसुरक्षामा कटिबद्ध भएर लाग्न डीआईजी दाहालले निर्देशन दिएका थिए । सभार : ब्लाष्ट
