इनरुवा । नेपाली कांग्रेसको भातृ संगठन नेपाल मुस्लिम संघले मुस्लिम समुदायको दोस्रो ठुलो महान चाडपर्व इदुल अजाहा (बकर ईद) पर्वको अवसरमा सार्वजनिक विदा दिनुपर्ने मागलाई सरकारले सम्वोधन गर्दै साउन ६ गते सार्वजनिक विदा दिने घोषणा गरेको छ ।
मुस्लिम समुदायको इदुल अजाहा (बकर ईद) पर्व श्रावण ६ गते हुने भएकोले नेपाल मुस्लिम संघ केन्द्रीय समितिका अध्यक्ष अब्दुल सतारले गृहमन्त्री बालकृष्ण खाँणलाई ध्यानाकर्षण गराउँदै विदाको माग गर्दै ज्ञापन पत्र बुझाएपछि सोमवार बसेको मन्त्रिपरिषद्को बैठकले मुस्लिम धर्मावलम्बीको पर्वको दिन सार्वजनिक विदा दिने निर्णय गरेको हो ।
सोमवार बसेको मन्त्रिपरिषद्को बैठकले मुस्लिम धर्मावलम्बीको पवित्र पर्व इदको अवसरमा साउन ६ गते बुधवार देशैभरि सार्वजनिक बिदा दिने निर्णय गरेको कानुन, न्याय तथा संसदीय व्यवस्था मन्त्री ज्ञानेन्द्रबहादुर कार्कीले जानकारी दिए ।
सुनसरी क्षेत्र नम्बर–४ बाट संघीय सांसदमा निर्वाचित भएका मन्त्री कार्की सरकारका प्रवक्ता समेत रहेकाले मन्त्रिपरिषदको निर्णय सुनाउँदै साउन ६ गते सार्वजनिक विदा दिने निर्णय गरेको उनले बताए ।
गृहमन्त्री खाँणलाई श्रावण ६ गते इदुल अजहा(बकर ईद) पर्व परेको हुदाँ अविलम्ब सार्वजनिक विदा घोषणा गरी मुस्लिम समुदायमा सकारात्मक सन्देश प्रवाह गर्न ज्ञापन पत्र मार्फत जानकारी गराएकोले मन्त्रिपरिषदको बैठकबाट नै निर्णय पारित भएको सरकारका प्रवक्ता ज्ञानेन्द्रबहादुर कार्कीले बताए ।
नेपाल मुस्लिम संघ प्रदेश नम्बर १ का अध्यक्ष हाजी इसराईल मन्सुरीले सरकारले गरेको निर्णय स्वागतयोग्य रहेको बताए ।
यसअघिका सरकारले विदाहरुलाई कटौती गरेकोले आफूहरुले विदालाई पुनः स्थापितको माग गर्दै प्रधानमन्त्री शेरबहादुर देउवा र गृहमन्त्री बालकृष्ण खाँणलाई ज्ञापन मार्फत सार्वजनिक विदा दिनुपर्ने मागलाई सरकारले सोमवार बसेको मन्त्रिपरिषदको बैठकबाट निर्णय पारित गरेकोले सरकारलाई धन्यवाद ज्ञापन गरेको नेपाल मुस्लिम संघ प्रदेश नम्बर–१ का अध्यक्ष हाजी मन्सुरीले बताए ।
मुस्लिम समुदाय लगायतका अन्य समुदायका चाडपर्वका विदाहरु प्रधानमन्त्री शेरबहादुर देउवाले विगतका दिनमा स्थापित रहेका हुनाले विदा दिनुपर्ने अडान सहित सरकारलाई ज्ञापन पत्र बुझाएर ध्यानाकर्षण गराउँदै पूर्व प्रधानमन्त्री केपी शर्मा ओली नेतृत्व सरकारले विदा कटौती गरी मुस्लिम समुदाय माथि धार्मिक प्रहार र अन्याय गरेको मुस्लिम संघको ठहर गरेको थियो ।
तर फेरी प्रधानमन्त्री शेरबहादुर देउवाको नेतृत्व सरकारले मुस्लिम समुदायको दोश्रो महान चाडपर्व इदुल अजाहा(बकर ईद) मा सार्वजनिक विदा दिएकोले मुस्लिम अगुवाहरुले सरकारको निर्णयलाई स्वागत गरेका छन् ।
कटौती गरिएका सम्पूर्ण विदा पुनः स्थापित गर्नुपर्ने नेपाल मुस्लिम संघले माग गर्दै आइरहेको जानकारी समेत गृहमन्त्रीलाई ज्ञापन पत्र मार्फत जानकारी गराएका थिए ।
मुस्लिम धर्मावलम्बीका लागि साउन ६ गते सार्वजनिक विदा घोषणा गरेपछि देशैभरका मुस्लिम समुदाय खुशी भएका छन् ।
