इनरुवा । सुनसरीको भोक्राहा नरसिंह गाउँपालिकामा स्थगित रहेको नेपाली कांग्रेसको पालिका स्तरीय १४ औं अधिवेशन आउँदो शनिवार हुने भएको छ ।
नेपाली कांग्रेस भोक्राहा नरसिंह गा.पा. को १४ औं अधिवेशनअन्र्तगत पालिका अधिवेशन असोज ९ गते विवादका कारण स्थगित भएकाले आउँदो शनिवार हुन लागेको हो ।
गत असोज ८ गते मनोनयन दर्ता पश्चात् सभापति पदका उम्मेदवार राजेन्द्र प्रसाद मेहताविरुद्ध उजुरी परेपछि दुई पक्षबीच विवाद उत्पन्न भएर निर्वाचन कार्यक्रम स्थगित भएको थियो ।
नेपाली कांग्रेस केन्द्रीय निर्वाचन समितिले भोक्राहा नरसिंहका तीन जनाको उम्मेदवारी खारेज भएको नेपाली कांग्रेस सुनसरीका सभापति राजीव कोइरालालाई लिखित जानकारी गराएको थियो ।
नेपाली कांग्रेस सुनसरीका सभापतिको नेतृत्वमा बसेको बैठकले तीनजनाको उम्मेदवारी खारेजी भएकोले निर्वाचनमा भाग नलिने शर्तमा भोक्राहा नरसिंहका दुबै पक्षबीच सहमति जुटेपछि असोज २३ गते शनिवारका लागि निर्वाचनको मिति तय भएको हो ।
नेपाली कांग्रेस १४ औं महाधिवेशन अन्तर्गत भोक्राहा नरसिंहमा हुने निर्वाचनमा सभापति पदमा दुई जनाबीच प्रतिस्पर्धा हुने भएको छ । शनिवार हुने निर्वाचनमा सभापति पदका उम्मेदवार युवराज दाहाल र देवनारायण महतोबीच प्रतिस्पर्धा हुने भएको छ ।
