सुनसरी । सुनसरीको कोशी गाउँपालिकाले श्री राष्ट्रिय माध्यमिक विधालय सोभनपुर (प्राविधिक धार सिभिल इन्जिनियरिङ) लाई बस हस्तान्तरण गरेको छ ।
कोशी गाउँपालिकाका अध्यक्ष ऐयुब अन्सारीले कोशी गाउँपालिका वडा–३ स्थित श्री राष्ट्रिय माध्यमिक विद्यालय सोभनपुरलाई बस हस्तान्तरण गरेका हुन् ।
कोशी गाउँपालिकाका अध्यक्ष ऐयुब अन्सारीले विद्यालयका प्रधानाध्यापक हरेकृष्ण राउत र व्यवस्थापन समितिका अध्यक्ष समसुल मन्सुरीलाई बसको साँचो हस्तान्तरण गरेका हुन् ।
कोशी गाउँपालिका अध्यक्ष अन्सारीले बस उद्घाटन कार्यक्रमलाई सम्वोधन गर्दै पालिकाभित्र शिक्षा क्षेत्रलाई विशेष प्राथमिकता दिँदै यस विधालयलाई शत प्रतिशत अनुदानमा बस दिने योजना कार्यान्वयन गर्न पालिका सफल भएको बताए ।
पालिकाले शिक्षा क्षेत्रमा महत्वपूर्ण भूमिका निर्वाह गर्दै आएको हुदाँ विधार्थीहरुलाई आवत जावत गर्न सहज हुने उद्देश्यले विधालयलाई बस हस्तान्तरणले सहजता भएको उनले बताए ।
अध्यक्ष अन्सारीले सुनसरी जिल्लामै शिक्षा क्षेत्रमा काम गर्न उत्कृष्ट पालिकाको रुपमा स्थापित गरेको सफल भएको चर्चा गर्दै उनले बिभिन्न क्षेत्रमा पनि काम गर्दै आएको बताए ।
सामुदायिक विधालयहरुमा गुणस्तर शिक्षलाई बढावा दिँदै आएकोले आगामी दिनमा पनि विधार्थीहरुको सहज र सरल ढंगबाट सबैको पहुँच हुने गरी शिक्षा आर्जन गर्नका लागि कसैलाई पनि भेदभाव नगरीकन शिक्षा हासिल गर्ने वातावरण समेत सिर्जना गरेको अध्यक्ष अन्सारीको भनाई छ ।
विधार्थीहरुले साईकल र पैदल यात्रा गरेर ढाढाबाट विधालयमा अध्ययन गर्न आउने समस्या अन्त्य गर्नका लागि बस प्रदान गरिएकोले सबै जातजातिका विधार्थीहरु बस चढेर समयमा अध्ययन गर्न आउने सक्ने गरि बसबाट सहयोग पुग्ने उनले दावी गरे ।
बसलाई सही सदुपयोग गर्न विधालय परिवार र व्यवस्थापन समितिलाई अनुरोध गर्दै पालिका अध्यक्ष अन्सारीले बस सञ्चालन गर्नका लागि कार्यविधि बनाउन समेत सुझाएका थिए । चालक, सहचालक, इन्धन खरिद, बसको मर्मत सम्भार र रेखदेख विधालयले स्वंय जिम्मेवारी लिनुपर्ने उनले बताए ।
नेपाल सरकारबाट राजस्व छुट सहित पालिकाबाट ३२ लाखको लागतमा बस खरिद गरिएको पालिकाले जनाएको छ ।
कार्यक्रममा श्री राष्ट्रिय मावि सोभनपुरका प्रधानाध्यापक हरेकृष्ण राउतले पालिकाले बस उपलब्ध गराएकोप्रति धन्यवाद व्यक्त गर्दै विधालयमा शैक्षिक सुधार सहित विधार्थीहरुको मनोवल उच्च पार्ने काम गरिरहेकोले विधार्थीहरुको आकर्षण बढ्दै गइरहेको बताए ।
कार्यक्रममा पालिकाकी उपाध्यक्ष अनितादेवी यादव,कोसी ३ का वडा अध्यक्ष सुलेमान मन्सुरी,बिद्यालय व्यवस्थापन समिति अध्यक्ष, प्रअ लगायतको उपस्थिति रहेको थियो ।
