इनरुवा । विवाहपञ्चमीको अवसरमा सुनसरी सदरमुकाम इनरुवामा भब्य रुपमा सीताराम रथयात्राको तयारी गरिएको छ ।
इनरुवा ४ स्थित रामजानकी गुठी संस्थानले भगवान राम र सीताको विवाह भएको अवसरमा विवाह समारोहसहित भब्य रथयात्राको तयारी गरेको हो ।
विवाहपञ्चमी महोत्सको अवसरमा सोमबार मटकोर र मंगलबार बृहद रथयात्रा कार्यक्रमको आयोजना गरिएको गुठी संस्थाका अध्यक्ष हरिलाल मेहताले जानकारी दिए ।
उनका अनुसार सोमबार साँझ मटकोर कार्यक्रमको आयोजना गरिने र मंगलबार विहान ११ बजेबाट रथयात्रा प्रारम्भ गरिने छ ।
इनरुवामा विगत एक दशकभन्दा बढी समयदेखि विवाहपञ्चमीको अवसर पारेर रामजानकी गुठी संस्थाले विवाह महोत्सवको आयोजना गर्दै आएको छ ।
यसवर्षको विवाह महोत्सवको क्रममा मंगलबार विहान निकालिने सीताराम रथयात्रा विहान ११ बजे मन्दिर परिषरबाट सुरुवात भई इनरुवाको सखुवागाछी, मुख्यबजार हुँदै इनरुवा २ मा रहेको लक्ष्मीनारायण मन्दिरमा पुग्ने छ ।
त्यहाँको कार्यक्रममा सहभागि भएपनि रथयात्रा पुन रामजानकी मन्दिर परिषरमा आउने छ । त्यहाँ प्रसाद वितरणको कार्यक्रमपछि रथयात्रा समापन हुने छ ।
रथयात्रालाई भब्य र ब्यवस्थित बनाउन स्वागत समिति, सुरक्षा स्वयमसेवक समिति, ब्यवस्थापन समिति लगायतका समितिहरु गठन गरेर आवश्यक ब्यवस्थापन गरिएको अध्यक्ष मेहताले जानकारी दिए ।
उनले सो दिन इनरुवा नगरपालिकाले स्थानीय विदा दिने गरी छलफल भएकोले इनरुवाको गौरबको रुपमा रहँदै आएको रामजानकी रथयात्रालाई भब्य बनाउन सहभागिताका लागि इनरुवाबासीसहित धर्मावलम्बीहरुलाई आग्रह गरे । सभार : कोशी हटलाइन
