इनरुवा । सुनसरीको इनरुवामा नेपाल निर्माण व्यवसायी संघ सुनसरीको १६ औ वार्षिक साधारण सभा सोमबार सम्पन्न भएको छ । नेपाल निर्माण महासंघका बरिष्ठ उपाध्यक्ष एडी लामाको प्रमुख आतिथ्यतामा साधारण सभा सम्पन्न भएको हो ।
कार्यक्रमको उद्घाटन सत्रलाई सम्बोधन गर्दै बरिष्ठ उपाध्यक्ष लामाले निर्माण व्यवसायीलाई राज्यले संरक्षण र सम्मान गर्न नसकेको आरोप लगाउनुभयो । उहाँले निर्माण व्यसायीहरुले सबै भन्दा बढी कर तिर्ने, विकट गाउँमा जोखिम मोलेर काम गर्ने भएपनि राज्यले सम्मान र संरक्षण नगरेकाले चिन्ता व्यक्त गर्नुभयो । उहाँले निर्माण व्यवसायी विना विकास सम्भव नभएकाले व्यवसायीका समस्या सम्बोधन गर्न सरकार समक्ष आग्रह गर्नुभयो ।
विकास आयोजना निर्माणमा राज्यकै कैयन नीति नियमले समेत ढिलाइ हुने भएपनि व्यवसायीलाई मात्रै दोष देखाउने प्रवृत्ति हटाउनुपर्ने उहाँले बताउनुभयो । महासंघका उपाध्यक्ष मोहन प्रसाद अधिकारीले निर्माण व्यवसाय क्षेत्रमा कोभिड र वर्तमान राजनीतिक परिस्थितिका कारणले गर्दा थप समस्या परेको भन्दै समस्या समाधानको लागि महासंघको वर्तमान नेतृत्व क्रियाशील रहेको बताउनुभयो ।
महासंघका महासचिव रोशन दाहालले सहज र सरल तरिकाले निर्माण सामाग्री उपलब्ध गराउन माग गर्नुभयो । सरकारले निर्माणको ठेक्का लगाउदाँ असार ३१ गतेसम्मको समय सीमा दिने तर क्रसर उद्योग र खोला असारको १ गतेबाट नै बन्द गर्ने भएकाले समस्या भएको औल्याउनुभयो ।
महासंघका कोशी प्रदेश अध्यक्ष जनसेवक भण्डारीले निर्माण उद्योगप्रति राज्य अनुदार रहेकोे दुखेसो पोख्नुभयो । उहाँले निर्माण व्यवसायीहरु एकिकृत र एकताको सुत्रमा बाधिएर टेण्डर कममा नहाली स्तरीय काम गर्न सकेको खण्डमा सम्मानित हुने भएकाले यसमा निर्माण व्यवसायीहरुले ध्यान दिनुपर्ने बताउनुभयो ।
संघका सुनसरी अध्यक्ष ऋद्धिराज कार्कीले स्थानीय तहले उपभोक्ता समितिलाई निरुत्साहित गरी इजाजत प्राप्त निर्माण व्यवसायीलाई प्रश्रय दिनुपर्ने बताउनुभयो । उहाँले एउटै र्फमले ५ वटा भन्दा बढि काम लिन नपाउने व्यवस्था गरिएकोमा निर्माण व्यवसायी महासंघलाई धन्यवाद दिदै कडाईका साथ लागु गर्नुपर्नेमा जोड दिनुभयो ।
कार्यक्रममा नेपाली काग्रेंसका सुनसरी सभापती एवम् इनरुवा नगर प्रमुख केदार भण्डारीले ठेक्का लिदाँ गुणस्तरीय काम गर्ने गरि पोसाउने दरभाउँमा लिन आग्रह गर्नुभयो । ठेक्का लिनका लागि ४० देखी ६० प्रतिसतसम्म कममा लिने गरेकाले गुणनस्तर प्रति प्रश्न उठेकाले त्यसमा सुधार गर्न संघ तथा महासंघलाई आग्रह गर्नुभयो ।
