काठमाडौं । नेपाल पत्रकार महासंघका केन्द्रिय सदस्य इफ्तखार हसन (इकवाल अहमद) लाई कतार स्थित नेपाली राजदुतावासका राजदुत डा. नरेश विक्रम ढकालले कार्यालयमा स्वागत गर्नुभएको छ ।
पुर्व निर्धारित कार्यक्रम अनुसार आज महासंघका केन्द्रिय तथा अल्पसंख्यक विभागका प्रमुख समेत रहनुभएका अहमदले नेपाली राजदुत डा.ढकालको कार्यकक्षमा भेटघाट गर्नुभएको हो ।
सुनसरी सदरमुकाम इनरुवाबाट प्रकाशित प्रतिक्षण राष्ट्रिय दैनिकका प्रकाशक सम्पादक अहमदले कतार स्थित नेपाली राजदुत डा. ढकालसँगको भेटघाट सौहार्दपूर्ण र उपलब्धिमुलक भएको बताउनुभयो ।
आजको भेटघाटमा नेपाली राजदुत डा. ढकालले कतारमा नेपाली कामदारहरुको अवस्था, बिभिन्न कारणले कतारको जेलमा रहेका नेपाली कामदारहरुलाई रिहाई गर्नका लागि पहल र नेपाली पत्रकारहरुको अवस्थाका बारेमा महासंघका केन्द्रिय सदस्य अहमदलाई जानकारी गराउनुभएको छ ।
कतार र नेपालबिचको सम्बन्धलाई पत्रकारिता मार्फत थप सुदृढ गर्न लागि पर्ने केन्द्रिय सदस्य अहमदले प्रतिवद्वता व्यक्त गर्नुभयो । राष्ट्रिय र अन्तर्राष्ट्रिय क्षेत्रबाट भएको सिकाईलाई आत्मसाथ गरि नयाँ पुस्तामा हस्तान्तरण गर्ने उद्देश्यले एक हप्ते कतार भ्रमणमा रहनुभएको उहाँले बताउनुभयो ।
कतारका लागि नेपाली राजदुत डा. ढकालले कतारमा रहेका नेपाली कामदाहरुलाई पर्न गएको समस्या समाधानका लागि हरपल तयार रहेको बताउनुभयो ।
डा.ढकालले नेपाली राजदुतवासले गर्नुपर्ने समन्वय, सहयोग र सहकार्यका लागि सदैव तयार रहेकोले नेपाली कामदारहरुको सुखदुःखमा साथ रहेको जानकारी दिनुभयो ।
अहमदले कतारका लागि नेपाली राजदुत डा. ढकाललाई स्वागत सम्मानका लागि धन्यवाद सहित अभार प्रकट गर्नुभएको छ ।
पत्रकार महासंघका केन्द्रिय अहमद त्रिभुवन अन्तर्राष्ट्रिय विमानस्थल काठमाडौंबाट जुन ६ तारिख अर्थात जेठ २३ गते प्रस्थान गर्नुभएको थियो ।
कतारको दोहा स्थित हमाद अन्तर्राष्ट्रिय विमानस्थलमा नेपाल पत्रकार महासंघ कतार शाखाका अध्यक्ष करिम बक्स मियाँ लगायतका पदाधिकारीहरु, पत्रकार अजमल अन्सारी लगायतका टोलिले स्वागत गर्नुभएको थियो ।
पत्रकार महासंघका केन्द्रिय सदस्य अहमद कतारको विभिन्न ठाउँको अवलोकन र कतारका मन्त्रीहरुसँग शिष्टाचार भेटवार्ता गर्नुहुनेछ । कतारको एक हप्ताको बसाईपछि अहमद जुन १३ तारिख अर्थात जेठ ३० गते मंगलवार स्वदेश फर्किनुहुनेछ ।
