सुकदेब चौधरी
इनरुवा ।सुनसरी जिल्ला अदालतले एक महिला अनुयायी माथि जवरजस्ती करणी मुद्दामा बुधबार सिद्धबाबा भन्ने कृष्णदास माथि अभियोग दावी नपुग्ने गरी सफाई दिने फैसला गरेको छ ।
सुनसरी जिल्ला अदालतका न्यायाधिश हरिप्रसाद कोइरालाको इजलासले अभियोग दावी नपुग्ने भन्दै जवरजस्ती करणी मुद्दाबाट सफाई दिने गरी फैसला गरेको हो ।
यसै मुद्दाको विषयमा २०७७ मङ्सिर २२ गते सुनसरी जिल्ला अदालतका तत्कालीन न्यायाधिश अर्जुनप्रसाद कोइरालाको इजलासले सफाइ दिएको थियो । उक्त फैसला उपर उच्च अदालत विराटनगरले सुनुवाई गदै सिद्ध बाबा कृष्णदास भनिने कृष्णबहादुर गिरीलाई सफाइ दिने गरी सुनसरी जिल्ला अदालतको फैसलालाई बदर गरि दिएको थियो ।
उच्च अदालतले बदर गरेपछि सो मुद्दा पुन जिल्लामा फर्किएको थियो । उच्च अदालत विराटनगरका कामु मुख्य न्यायाधीश सत्यमोहन जोशी थारु र किरणकुमारी गुप्ताको संयुक्त इजलासले जिल्लाको फैसला बदर गरेको हो ।
सो इजलासले पीडित र पीडक पक्षबिच भएको भ्वाइस कलको परीक्षण गर्न, पीडित महिलाको स्वास्थ्य परीक्षण गर्ने डाक्टरको बकपत्र गर्न र पीडित र पीडक पक्षका साक्षीको बकपत्र गर्न र प्रमणहरु बुझेर पुन इन्साफ गर्न आदेश दिएको हो ।
२०७६ कात्तिक ४ गते राति सिद्ध बाबाले जबरजस्ती करणी गरेको पीडितले दाबी गरेकी छन् । उनले २०७६ मङ्सिर ११ गते महिला अनुयायीले जिल्ला प्रहरी कार्यालय सुनसरीमा जाहेरी दिएकी थिइन् । जाहेरी पछि गिरीलाई १४ पुस २०७६ मा सुनसरी जिल्ला अदालतका तत्कालीन न्यायाधीश राधाकृष्ण उप्रेतीको इजलासले तीन लाख धरौटीमा छाड्ने आदेश दिएको थियो ।
९ माघ २०७६ मा उच्च अदालत विराटनगरका तत्कालीन मुख्य न्यायाधीश तिलप्रसाद श्रेष्ठ र न्यायाधीश प्रेमराज कार्कीको इजलासले थुनामै राखेर मुद्दाको पुर्पक्ष गर्न आदेश दिएको थियो । २२ मङ्सिर २०७७ मा जिल्ला अदालत सुनसरीले गिरीलाई सहमति करणी गरेको देखिएकाले जवरजस्ती करणी नठहरिने फैसला गरेको थियो ।
जिल्लाको फैसलामा भनिएको थियो, ‘जाहेरवाली र प्रतिवादी बिच आदान प्रदान भएका म्यासेजहरूबाट सहमतिमा शारीरिक सम्पर्क भएको भन्ने देखिएकोले अभियोग दाबीबमोजिम जबरजस्ती करणीको कसुर कायम गर्न मिल्ने देखिएन ।’
