इनरुवा । सुनसरीको इनरुवा–९ जमुवा टोलमा निःशुल्क दन्त शिविर तथा जनचेतना कार्यक्रम सम्पन्न भएको छ । जुनियर जेसीज इनरुवाको आयोजनामा एक दिने निःशुल्क दन्त शिविर तथा जनचेतना कार्यक्रम मंगलबार सम्पन्न भएको हो । सो शिविरमा एक सयभन्दा बढीले दातसम्बन्धी सेवा पाएका थिए । इनरुवा–९ जमुवाका एक सयभन्दा बढीले दातसम्बन्धी सेवा पाउनुका साथै उनीहरुलाई औषधिसमेत निःशुल्क वितरण गरिएको छ ।
जुनियर जेसीज इनरुवाले यसअघि पनि बालबालिकाहरुलाई निःशुल्क शिविरबाट सेवा प्रदान गरिएको थियो । जुनियर जेसीजले इनरुवामा सामाजिक कार्यहरु गर्दै आएको जुनियर जेसीज इनरुवाका अध्यक्ष कुनाल साहले जानकारी दिए । इनरुवाको विभिन्न क्षेत्रमा कार्य गर्ने लक्ष्य बोकेका जुनियर जेसीजले निःशुल्क शिविर गरेर स्वास्थ्य क्षेत्रलाई प्राथमिकता दिएर कामलाई अगाडि बढाएको जुनियर जेसीजका कार्यकारी उपाध्यक्ष अनुराग ढकालले बताए ।
जुनियर जेसीजमा युवाहरुको सक्रिय सहभागितामा सामाजिक कार्य गर्दै अगाडि बढिरहेको बेला विभिन्न सहयोगी निकायसँग समन्वयमा सामाजिक क्षेत्रमा भूमिका खेल्दै आएको जुनियर जेसीजका उपसभापति पिन्टुराम साहले बताए । सो शिविरमा १० जनाले दाँत निकालेका थिए ।
कार्यकारी उपाध्यक्ष सदन गुप्ता, उपसभापति पिन्टुराम साह, उपसभापति कृष्ण सरदार, युवा संयोजक निर्णय श्रेष्ठ, कानूनी सहलाकार अजय साह, व्यापार संयोजक अथारभा आचार्य, कोषाध्यक्ष निकेश सिंह, उपसभापति पुष्पराज मेहता लगायतकाले सोमबार इनरुवा–९ जमुवा टोलमा दन्त शिविरसम्बन्धी जनचेतना फैलाउँदै प्रचारप्रसार गरी शिविरको फाइदा लिनका लागि सबैलाई अनुरोध गरेका थिए । भगवती डेन्टल क्लिनिक एण्ड अर्थोडन्टिक केयरले निःशुल्क औषधि उपलब्ध गराएको थियो भने डाक्टर प्रकृति घिमिरे र डाक्टर सुयोग गिरीले सेवा प्रदान गरेको आयोजकले जनाएको छ ।
