गणेश यादव
इनरुवा । सुनसरीको इनरुवामा प्रथम उराँव स्तरीय भाले कप नकआउट फुटवल प्रतियोगिता आइतवार सम्पन्न भएको छ ।
नेपाल उराँव क्लव इनरुवा ४ बर्सेडाँडा हरियाली टोल इनरुवा ४ सुनसरीको आयोजना र ४ नम्बर वडा कार्यालयको सहयोगमा नकआउट फुटवल प्रतियोगिता सम्पन्न भएको हो ।
वडा कार्यालयले खेलकुद सामाग्री प्रदान गरेको र बैदेशिक रोजगारमा रहेका उराँव समुदायको युवाहरुले पनि रकम संकलन गरेर प्रतियोगितालाई सफल बनाउन सहयोग गरेको आयोजकले जनाएको छ ।
मंसिर १३ गतेदेखी सञ्चालन भएको प्रथम उराँव स्तरीय भाले कप नकआउट फुटवल प्रतियोगिता आइतवार सम्पन्न भएको छ । सो प्रतियोगितामा आयोजक संस्था नेपाल उराँव क्लव इनरुवा ४ प्रथम भएको छ भने दोश्रो मधुवन टिम भएको स्थानीय सुरज उराँवले जानकारी दिएका छन् ।
प्रथम हुनेलाई १६ केजी कुखुरा र दोश्रोलाई १० केजी कुखुरा सहित मेडल एवं प्रमाण पत्र वितरण गरिएको आयोजक संस्थाका अध्यक्ष अशोक उराँवले बताएका छन् ।
उराँव समुदायको युवाहरुलाई संगठित बनाउन र उराँव भाषाको संरक्षण सम्वद्र्धन गर्नका लागि खेलकुदको माध्यमबाट एकीकृत गर्न खोजेकोले फुटवल प्रतियोगिताको आयोजना गरेको आयोजक संस्थाका सचिव उमेश उराँवले बताए ।
इनरुवामा बिभिन्न खेलकुद भएपनि उराँव जातजातिको मात्रै सहभागिता भएर कुनै पनि खेलकुद नभएकाले उराँव जातिको पहिचानको लागि र उराँव जातजातिबाट पनि खेलाडी उत्पादन गर्नका लागि यो नकआउट फुटवल प्रतियोगिताको आयोजना गरेको उनले बताए ।
प्रतियोगितामा प्रमुख अतिथि वडाका सदस्य लक्ष्मी बर्मा, बिशिष्ट अतिथिमा कृषि ज्ञान केन्द्रका प्रमुख नुनुलाल उराँव, उराँव भाषामा पीएचडी गरेको रामकिसुन उराँव, टोल विकास संस्थाका अध्यक्ष राजकुमार उराँव, दयानन्द उराँव, सशस्त्र प्रहरीका प्रतिनिधि लगायतको सहभागिता रहेको थियो ।
