इनरुवा । कोसीटप्पु वन्यजन्तु आरक्षमा अर्ना गणना कार्यक्रम सम्पन्न भएको छ । कोसीटप्पु वन्यजन्तु आरक्षमा दुई वर्षमा अर्नाको संख्यामा १२ दशमलव ९ प्रतिशतले वृद्धि भएको छ ।
कोसीटप्पु वन्यजन्तु आरक्षमा वैशाख ५ गते अर्ना गणनामा अटिने प्राविधिकहरुलाई अभिमुखीकरण तालिम दिई वैशाख ६ गतेदेखि ११ गतेसम्म अर्नाको गणना गर्दा आरक्ष क्षेत्रमा ५७ वटाको अर्नाको वृद्धि भएको आयोजित पत्रकार सम्मेलनमा बताइएको छ ।
अर्ना अणनाअनुसार आरक्षमा रहेको चार सय ४१ अर्नामा दुई वर्षयता ५७ वटा अर्ना बढेर कुल चार सय ९८ को पुगेको आरक्षले जनाएको छ ।
आरक्षले आइतबार अर्ना गणना २०७८ सार्वजनिकीरण कार्यक्रम गरेर दिएको जानकारीअनुसार आरक्षमा कुल अर्नाको संख्या चार सय ९८ पुगेको जनाएको छ ।
आरक्षको अर्ना गणना तथ्यांक सार्वजनिकीरण कार्यक्रमका प्रमुख अथिति सुनसरीका प्रमुख जिल्ला अधिकारी उमेशकुमार ढकाल र कोसी गाउँपालिकाका अध्यक्ष ऐयुब अन्सारीले अर्नाको तथ्यांक वाचन गरेर सार्वजनिक गरेका थिए । तथ्याङ्क विवरणमा आरक्षमा दुई सय २१ वटा वयस्क भाले अर्ना, एक सय ६२ वटा वयस्क पोथी अर्ना, ४८ वटा अर्ध वयस्क, दुई वर्ष मुनिको बच्चा अर्ना ३५ वटा र एक वर्षको बच्चा अर्ना ३२ वटा गरी जम्मा चार सय ९८ वटा उल्लेख भएको छ ।
सुनसरीका प्रमुख जिल्ला अधिकारी उमेशकुमार ढकालले अन्तर्राष्ट्रिय पद्धति अपनाएर अर्नाको तथ्याङ्क संकलन कार्य सम्पन्न गरेकाले सम्पूर्ण टिमलाई धन्यवाद व्यक्त गरेका छन् । आरक्षमा अर्नाको संख्या दिनहुँ बढ्दै गएकाले आरक्षको लागि सुखद कुरा भएको उनले बताए ।
आरक्षमा रहेको अर्नालाई संरक्षण सम्बद्र्धन गर्न सबैले एकजुट हुन आवश्यक रहेको उनले बताए । आरक्षलाई निकुञ्ज बनाउन प्रयास र प्रयत्न आफूले पनि गर्ने प्रतिबद्धतासमेत व्यक्त गरेका छन् । आरक्षको प्रचारप्रसार गर्नुपर्ने, संरक्षण गर्नुपर्ने, प्राकृतिक सम्पदाको संरक्षण र प्रबद्र्धन गर्नुपर्ने र अगामी दिनमा सहकार्य गरी अगाडि बढ्नुपर्ने प्रमुख जिल्ला अधिकारी ढकालले बताए ।
कोसी गाउँपालिकाका अध्यक्ष ऐयुब अन्सारीले सुनसरी, सप्तरी र उदयपुरको महत्वपूर्ण गहनाका रुपमा रहेको कोसीटप्पु आरक्षलाई संरक्षण गर्न आवश्यक रहेको बताए । उनले अर्ना संरक्षण गर्ने, अर्ना मार्न नदिने, अर्ना आरक्षको सुन्दरता बढाएकाले पर्यटकहरूको मुख्य आकर्षण नै अर्ना भएकाले आरक्ष विकास गरी सबैको लोकप्रिय ठाउँको रुपमा चिनाउन आवश्यक रहेको बताए ।
मुलुकभरिमा आरक्षहरु निकुञ्जमा परिवर्तन गरे पनि सुनसरीमा रहेको आरक्षलाई परिर्वतन नगरेकाले यसलाई राज्यले समयमा नै सम्बोधन गर्नुपर्ने अध्यक्ष अन्सारीको भनाइ छ ।
कोसी गाउँपालिकाकी उपाध्यक्ष अनिता यादवले आरक्ष देशकै उत्कृष्ट रहेको दावी गरेकी छिन् । आरक्षलाई निकुञ्ज बनाउन राज्यले ध्यान दिनुपर्ने बताइन् । पर्यटकहरुले अर्नाका लागि भए पनि अवलोकन गर्न आउने भएकाले आरक्षबाट अन्यत्र अर्ना सार्न नहुनेसमेत उनले बताइन् ।
कार्यक्रममा आरक्षका प्रमुख संरक्षण अधिकृत अशोक रामले सहमति र सहकार्यबाट मागहरुलाई सम्बोधन गर्न आफू तत्पर रहेको बताए । आरक्षको संरक्षण र व्यवस्थापन गर्न आफू लागिपरेको बताए ।
आरक्षभित्र १४ वटा हात्ती र चार सय ९८ वटा अर्ना रहेकाले संरक्षण गर्न राज्यले पनि भूमिका खेलेको बताए । उनले अर्नाको संरक्षण केन्द्रको रुपमा रहेकोले प्रभावकारी ढङ्गबाट संरक्षण गर्नुपर्नेमा जोड दिएका थिए ।
