मिकाइल आलम
भण्टाबारी। भोक्राहा नरसिंह गाउँपालिकामा उपभोक्ता समितिहरूमार्फत् बजेट दुरुपयोग हुने गरेको पाइएको छ ।
भोक्राहा गाउँपालिकामा सडक, भवन निर्माणलगायत विकास निर्माणसँगै विभिन्न सामुदायिक परियोजना सञ्चालनका लागि बनाइने त्यस्ता उपभोक्ता समितिमाथि नियमन र निगरानी नहुँदा बजेट दुरुपयोग हुने क्रम बढेको पाइएको हो ।
भोक्राहा नरसिंह गाउँपालिका क्षेत्रका जनप्रतिनिधिहरूले विकास निर्माणका कार्यमा आफू निकटका मान्छेलाई उपभोक्ता समितिमा राख्दै गुणस्तरहीन कामसँगै व्यापक अनियमितता गर्दै आएको स्थानीयको आरोप छ । ‘जनप्रतिनिधि सबैका साझा हुनुपर्नेमा भोक्राहा नरसिंह गाउँपालिका क्षेत्रका जनप्रतिनिधिहरूले विकास निर्माणका काममा जनतासँग विभेद गर्दै आएका छन्’ नेपाली काङ्ग्रेसका स्थानीय नेता हाजी इसराइल मन्सुरीले आरोप लगाउँदै भने, ‘गाउँपालिकाको सबै वडामा समान विकास हुन सकेको छैन ।’
अध्यक्ष र उपाध्यक्षका वडामा मर्मत गरे पुग्ने बाटो भत्काएर पुनः पिच गरिएको तर, अन्य वडामा भत्केका सडक पनि मर्मत नगरिएको उनले बताए । पहिलेदेखि नै पछाडि परेका वडालाई बढी प्राथमिकता दिइनुपर्नेमा जनप्रतिनिधिले त्यसो नगरी पहुँच र कमिसनका आधारमा काम बाँड्ने गरेको मन्सुरीको भनाइ छ ।
१५ लाखमा गरिएको घेराबेरा भत्काइयो
एकातिर जनप्रतिनिधि आएपछि पूर्वाधार निर्माणमार्फत् बजेट दुरुपयोग भइरहेको गुनासो सुनिन्छ भने अर्कोतिर कर्मचारीको मनोमानी बढेको स्थानीय बताउँछन् । भोक्राहा नरसिंह गाउँपालिकाको भवन बनाउनका लागि पाँच कठ्ठा अनुदान र पाँच कठ्ठा जग्गा सुलभ दरमा खरिद गरेको गाउँपालिकाको कार्यालयले उक्त जग्गामा गरिएको घेराबारा भत्काएको छ । माटो हालेर कच्ची बाटोसहित चारमहिना पहिले १५ लाख लागतमा निर्माण गरिएको घेराबारा बजेट दुरुपयोग गर्ने उद्देश्यले गरिएको स्थानीयको आरोप छ । ‘भोक्राहा नरसिंह गाउँपालिकाले उपभोक्ता समितिमार्फत् चारमहिना पहिले बनाएको पिल्लर र तारसहितको घेराबारा बजेट सिध्याउने माध्यम मात्र बनेको देखिन्छ’–स्थानीय हबिब मन्सुरीले भने ।
‘आवश्यक थिएन भने किन त्यत्रो लगानी गरेर घेराबारा गरिएको नेता इसराइल मन्सुरीले प्रश्न गर्दै भने, ‘यो बजेट सिध्याउने खेल मात्र हो ।’ १५ लाखमा एउटा वडाको बाटो पिच गर्दा स्थानीयलाई आवत–जावत गर्न सहज हुने भए पनि यहाँका जनप्रतिनिधि र कर्मचारीहरूलाई जनताको फाइदासँग कुनै सरोकार नरहेको र उनीहरू आफ्ना फाइदा मात्र खोज्ने गरेको उनको आरोप छ ।
यता भोक्राहा नरसिंह गाउँपालिकाका प्राविधिक आशिष निखिल साहले योजनाअनुसार नै गाउँपालिकाले कार्यालय भवन निर्माण गर्न खरिद गरेको जग्गामा घेराबारा गरिएको बताए । नाम उल्लेख नगर्ने शर्तमा उपभोक्ता समितिका एकजना सदस्यले माटो हालेर १० कठ्ठा जग्गामा १५ लाख लागतमा घेराबारा गरिएको बताए पनि प्राविधिक साहले भने ५ लाख लागतमा मात्र घेराबारा गरिएको दाबी गरे ।
गाउँपालिकाले खरिद गरेको जग्गा छुटाउन र भवन निर्माण कार्यमा ढिलाइ हुँदा निर्माण सामग्री चोरी हुनसक्ने कुरालाई मध्यनजर गर्दै घेराबारा गरिए पनि अपेक्षा गरिएभन्दा पहिले नै निर्माणकार्य सुरु भएकोले घेराबारा भत्काइएको प्राविधिक साहको भनाइ छ ।
निर्वाचनका बेला सडक, खानेपानी, सिंचाइ, बिजुलीजस्ता आधारभूत विकासलाई प्राथमिकता दिने प्रतिबद्धता गरेका यहाँका जनप्रतिनिधिले अहिले आफ्ना नेताकार्यकर्ता अनुकूल बजेट बाँड्ने र विवादास्पद निर्णय गर्दै आएका छन् । आवश्यकता अनुसार विकास निर्माण भएको पाइँदैन ।
यसैबीच भोक्राहा नरसिंह गाउँपालिकाको भवन निर्माणमा कमसल सामग्री प्रयोग भइरहेको पाइएपछि स्थानीयले रोकेको निर्माणकार्य बिहीबारबाट पुनः सुरु भएको छ । कमसल सामग्रीको प्रयोग गरी भएको गाउँपालिकाको भवन निर्माणकार्य भत्काई पुनः निर्माण गर्ने गरी काम थालिएको ठेकेदार कम्पनी आशिर्वाद कन्स्ट्रक्सन प्रालिका प्राविधिक सरोज रायले जानकारी दिए । जनप्रतिनिधि, कर्मचारी र ठेकेदार कम्पनीलाई पटक–पटक ध्यानाकर्षण गराउँदासमेत कमसल सामग्रीको प्रयोग गरी निर्माणकार्य हुने क्रम नरोकिएपछि स्थानीयवासीले बुधबार काम रोकेका थिए ।
