इनरुवा । नेपाली कांग्रेस सुनसरीका सभापति केदार भण्डारीले कांग्रेस कसैसँग नडराउने बताएका छन् । सुनसरीको कोसी गाउँपालिकाको लौकहीमा आयोजित विरोध सभालाई सम्वोधन गर्दै त्यो बताएका हुन् ।
नेपाली कांग्रेस सुनसरी क्षेत्र नम्बर–४ ले आयोजना गरेको विरोध सभालाई सम्वोधन गर्दै सुनसरी कांग्रेसका सभापति भण्डारीले कांग्रेसका नेता तथा कार्यकर्तालाई धम्काउने, डराउने र दम्भ देखाउन खोज्यो भने नेपाली कांग्रेसलाई सहनय नहुने बताए । उनले भने, ‘सि के राउतका कार्यकर्ताले धम्काउने वितिकै कांग्रेस कसैसँग डराउँदैन ।
कांग्रेसको कुनै जात, धर्म हुँदैन् । कहिल्यै मुस्लिम र कहिल्यै हिन्दुको नाममा कांग्रेसलाई फोडन खोज्न त्यो भ्रम मात्र हो । नेपाली कांग्रेस कसैको नारासँग कुनै पनि हालतमा फुटदैन् । कुनै असहमति र असमझदारी भए वार्ता गर्न तयार रहेको छु । भ्रष्टाचारको डण्डा देखाएर धम्काउने कामबाट नेपाली कांग्रेस डराउनेवाला छैन् । ’
भण्डारीले नेपाली कांग्रेस पार्टी बम र बन्दुकबाट डराउने पार्टी नभएको बताउदै तत्काल हिंसात्मक आन्दोलन नरोकिएको अवस्थामा प्रतिकार गर्न कांग्रेसका कार्यकर्ता तयार रहेको चेतावनी दिए ।
माघ १६ गते आइतबारका दिन कोसी गाउँपालीकाका अध्यक्ष तथा नेपाली काङ्ग्रेस सुनसरी क्षेत्र नम्बर ४ का सभापति समेत रहेका ऐयुब अन्सारीसँग उनको कार्यकक्षमै पुगेर जनमत पार्टी नेपालका कार्यकर्ताहरुले दुव्र्यवहार गरेपछि अध्यक्ष अन्सारीका समर्थक आक्रोशित भएका थिए ।
कार्यालय समयमा सेवाग्राहीको काम गरिरहेको बखत केही अवाञ्छित व्यक्तिहरु कार्यालय भित्र प्रवेश गरी कोरोना पीडितको नाउँमा निहुँ खोज्दै आफूमाथि दुव्र्यवहार गर्दै आफू चढ्ने सरकारी गाडी को १ झ ५३९ तोडफोड गरिएको अध्यक्ष अन्सारीको भनाइ छ । उनले जनमत पार्टी नेपाललगायत अराजक पार्टी वा समूहका नेताकार्यकर्ताहरुलाई कानुनी दायरामा ल्याउन माग गरे ।
घटनामा संलग्न रहेको भन्दै सुनसरी प्रहरीले राजकुमार यादव, देवकुमार यादव, ब्रहमदेव यादव, विकास यादव र अलिम मंसुरीलाई नियन्त्रणमा लिई उनीहरूमाथि पाँचदिनको म्याद थप गरेर अभद्र व्यवहार मुद्दामा आवश्यक कारबाही अगाडि बढाइएको सुनसरी प्रहरीले जनाएको छ ।
यता नेपाली कांग्रेस सुनसरी क्षेत्र नम्बर ४ का सभापति तथा कोसी गाउँपालीकाका अध्यक्ष ऐयुब अन्सारीमाथि भएको आक्रमण बारे ध्यानाकर्षण भएको सुनसरी कांग्रेसले जनाएको छ । सभापति अन्सारीमाथि व्यक्तिगत आक्रमण गर्ने दोषीलाई नियन्त्रणमा लिई कारबाही गर्न माग गर्दै सोमबार जिल्ला प्रशासन कार्यालय सुनसरीलाई नेपाली कांग्रेस सुनसरीले ज्ञापनपत्रसमेत बुझाएको छ ।
प्रधानमन्त्रीको कार्यालय सिंहदरवार काठमाण्डौं मार्फत सुनसरीका प्रमुख जिल्ला अधिकारी इन्द्रदेव यादवलाई ज्ञापन पत्र बुझाएका हुन् । सुनसरीका प्रमुख जिल्ला अधिकारी यादवले दोषीलाई कानुनी दायरामा ल्याई कार्वाही गरिने विश्वास व्यक्त गरेका छन् ।
