इनरुवा। सुनसरीको इनरुवा नगरपालिका–८ डुम्राहाका एक युवा वैदेशिक रोजगारीका क्रममा मलेसियामा काम गर्ने क्रममा मृत्यु भएको छ । मृत्यु भएको एक हप्ता बितिसक्दा पनि शव आइनपुग्दा मृतकको परिवारका सदस्यहरु चिन्तामा परेका छन् ।
इनरुवा नगरपालिका–८ का ३७ वर्षीय रामप्रसाद यादव १८ महिनाअघि मलेसियामा काम गर्न गएका थिए तर काम गर्ने क्रममा उनको मृत्यु भएपछि यादवको शवलाई नेपाल नपठाएको मृतकको भतिजा न्यूटन यादवले
जनाएको छ ।
मृतक यादवको शव कहिले आउँछ भन्ने पर्खाइमा उनको आफन्तहरु रहे पनि अहिलेसम्म शव नआउँदा उनको घरमा रुवावासी हुने गरेको छ । शव ल्याउनका लागि आफन्तहरुले पहल गरिरहँदा पनि अहिलेसम्म शव नआउँदा उनका परिवार चिन्तित भएका छन् ।
यादव मलेसियामा सेक्युरिटी गार्डको काम गरिरहेका थिए । काम गर्ने सिलसिलामा उनको मृत्यु भए पनि यादवको शव नेपाल पठाउन त्यहाँको कम्पनी र सरकारले कुनै वास्ता नगरेको मृतकको परिवारले गुनासो गरेका छन् ।
शव ल्याउन पहल गर्नका लागि आप्रावासन सूचना केन्द्र सुनसरीमा जानकारी गराएको उनको आफन्तहरुले जनाएको छ । यादवको शव ल्याउन पहल गरिदिनका लागि सम्बन्धित निकायहरुमा समन्वय गरेको सामी परियोजनाले जनाएको छ ।
आप्रावासन सूचना केन्द्र सुनसरीका परामर्शकर्ता प्रमोद मेहताले यादवको शव ल्याउनका लागि कागजी प्रक्रिया पूरा गरी सम्बन्धित निकायमा पठाएको र शव ल्याउनका लागि पहल गरिरहेको बताए ।
नेपाल सरकारले पनि यादवको शव ल्याउन पहल तथा समन्वयकारी भूमिका खेलिदिनका लागि उनका आफन्तहरुले अनुरोध गरेका छन् । मलेसियाको सेरी कोलेक सेक्युरिटी नामक कम्पनीमा कार्यरत रहेका यादवको पासपोर्ट नम्बर १११५६४२३ रहेको र उनको मृत्यु भएको एक हप्ता बितिसक्दा पनि शव नआउँदा उनका आफन्तहरु शवको पर्खाइमा बसिरहेका छन् ।
छिटोभन्दा छिटो शव नेपाल पठाउन मृतकको आफन्तहरुले मलेसिया र नेपाल सरकारलाई अनुरोध गरेको हुँदा उनको शवलाई नेपाल पठाई आफन्तहरुलाई जिम्मा लगाउनुपर्ने सरोकारवालाहरुले जोड दिएका छन् ।
मृत्यु भएको एक हप्ताभन्दा बढी बितिसके पनि शव नआएकाले नेपाल सरकार, श्रम मन्त्रालय लगायतका बिभिन्न सरोकारवालाहरुले पहल तथा समन्वय गरी सहयोग गर्नुपर्ने इन्सेकका जिल्ला प्रतिनिधि जयकृष्ण
यादवले बताएका छन् ।
