इनरुवा । सुनसरीको चतरा स्थित रमानन्द शक्तिपिठका प्रमुख समेत रहेका सिद्धबाबा भनिने कृष्ण बहादुर गिरीलाई सोमबार अभियोग पुष्ठि नभएपछि सफाइ पाएका छन् ।
सुनसरी जिल्ला अदालत इनरुवाले एकवर्षदेखी पुर्पक्षका लागि कारागारमा रहेका सिद्धबाबालाई अभियोग पुष्ठि नभएको भन्दैं सफाई दिएको हो । सुनसरी जिल्ला अदालतका एक नम्बर इजलासका न्यायधिश अर्जुन प्रसाद कोइरालाले नेपाल सरकारले लिएको अभियोग दावी बमोजिम प्रतिवादीलाई जवरजस्ती करणीको कसुरमा सजाय हुनुपर्ने भन्ने अभियोग पुष्टि नभएकाले आरोपित सफाई हुने फैसला गरेका हुन् ।
सोमबार फैसला भएसँगै क्षेत्रिय कारागार झुम्कालाई रिहाका लागि पत्र पठाएको सुनसरी जिल्ला अदालतका श्रेस्तेदार नरेन्द्रकेसरी पोखरेलले बताएका छन् । ।
यता क्षेत्रिय कारागार झुम्काका निमित प्रमुख राजेन्द्र कुमार कार्कीले फैसला भएको जानकारी आएको र पत्र अनुसार सिद्धबाबालाई कारागारबाट मुक्त गरिएकोे प्रतिक्रिया दिएका छन् ।
सिद्धबाबा बिरुद्ध पीडित महिलाले २०७६ साल पुस १० गते जबरजस्ती करणी गरेको भन्दै मुद्धा दायर गरेका थिए । सुरुमा जिल्ला अदालत सुनसरीले धरौटीमा रिहा गर्न दिएको आदेश बदर गर्दै उच्च अदालत विराटनगरले पुर्पक्षका लागि कारागारमा राख्नुपर्ने आदेश दिएको थियो । त्यसकै निरन्तरता दिन सर्वोच्चले पनि भनेकोमा मुद्धाको अन्तिम किनारा लाग्दा भने सिद्धबाबा निर्दोष सावित हुदैं सफाई पाएका हुन् ।
उच्च अदालत विराटनगरका एक नम्बर न्यायाधीश प्रेमप्रसाद कार्की र २ नम्बर न्यायाधीश तिलप्रसाद श्रेष्ठको संयुक्त इजालसले गिरीलाई पुर्पक्षमा राख्न आदेश दिएको थियो ।
२०७६ सालको असोजमा आफ्नै अनुयायीलाई बलात्कार गरेको आरोपमा जिल्ला अदालत सुनसरीमा पीडित महिलाले मुद्दा दर्ता गर्नुभएको थियो । त्यस मुद्दामा जिल्ला अदालत सुनसरीका तत्कालिन मुख्य न्यायाधीश राधकृष्ण उप्रेतीले तीन लाख रुपैयाँ धरौटीमा रिहा गर्ने आदेश दिएको थियो ।
जिल्ला अदालतको आदेशविरुद्ध जिल्ला सरकारी वकिलको कार्यालय सुनसरीले उच्च अदालत विराटनगरमा निवेदन दिएको थियो । जिल्लाको आदेश चित्त नबुझेको र प्रतिवादीलाई थुनामा राखेर कारबाहीको प्रक्रिया अगाडि बढाउनुपर्ने भन्दै उच्च अदालत विराटनगरमा निवेदन दर्ता गरिएको थियो।
