इनरुवा । सुनसरीको बराहक्षेत्र नगरपालिका वडा नम्बर ८ मा सामाजिक लेखाजोखा कार्यक्रम सम्पन्न भएको छ ।
ग्रामीण समाज उत्थान केन्द्र सुनसरीको आयोजना र प्लान इन्टरनेसनल नेपालको सहयोगमा तथा बराहक्षेत्र नगरपालिकाको समन्वयमा मंगलबार शिशु ज्योती अधारभूत विद्यालयमा सामाजिक लेखाजोखा कार्यक्रम सम्पन्न भएको हो ।
‘गुणस्तरीय शिक्षा आजको आवश्यकता’ भन्ने मूल नाराका साथ लैङ्गिक रुपान्तरणमुखी समावेशी शिक्षा कार्यक्रमअन्तर्गत शिशु ज्योती आधारभूत विद्यालयमा दुई कोठे भवन निर्माण कार्य सम्पन्नको सामाजिक लेखाजोखा कार्यक्रम सम्पन्न भएको आयोजकले जनाएको छ ।
विद्यालयमा दुई कोठे भवन निर्माण कार्य सुरु गरेको एक वर्षपछि कार्य सम्पन्न गरेपछि ग्रामीण समाज उत्थान केन्द्र सुनसरीले एक कार्यक्रमका बीच विभिन्न सरोकारवालाहरुको उपस्थितिमा सामाजिक लेखाजोखा कार्यक्रम गरिएको हो ।
शिशु ज्योति आधारभूत विद्यालयमा कोठा अभाव भएको र विद्यार्थीहरुलाई पठनपाठन गर्न समस्या भएकोले सो विद्यालयलाई छनौट गरी दुई कोठे भवन निर्माण कार्य सम्पन्न गरेको हो ।
बराहक्षेत्र नगरपालिकाकी उपप्रमुख कमला मगरले नवनिर्मित भवनको उद्घाटन गरेकी थिइन् । उद्घाटन गर्दै उपप्रमुख मगरले सबैको समन्वय र सहकार्यबाट दुई कोठे भवनको निर्माण कार्य सम्पन्न भएको बताइन् ।
मगरले विद्यालयमा भवनको अभावले बालबालिकाहरुलाई पठनपाठन गर्न समस्यालाई मध्यनजर गर्दै भवन निर्माण सम्पन्न भएपछि समस्या अन्त्य भएको बताइन् ।
स्वास्थ्य मापदण्डलाई ख्याल गरी बालबालिकाहरुलाई गुणस्तर शिक्षा प्रदान गर्न, बालमैत्री विद्यालय बनाउन आग्रह गर्दै उनले भनिन्, ‘दुई कोठे भवनमा अपाङ्गतामैत्री बनेको र कक्षा कोठामा बालबालिकाहरुका लागि चित्रहरु राखेको हुँदा शिक्षण सिकाइ क्रियाकलाप प्रभावकारी हुनेछ ।’
बराहक्षेत्र नगरपालिका वडा नम्बर ८ का वडाध्यक्ष फणिन्द्र भट्टराईले शिशु ज्योतिमा गरीब, अति विपन्न र पछाडि पारिएका बालबालिकाहरुलाई पठनपाठन गर्न सहज हुने बताए ।
भवन निर्माण कार्यमा कुनै अनियमितता नभएको र सबै काममा समुदायका व्यक्तिबीच पारदर्शी ढङ्गबाट भएको उनले बताए ।
बराहक्षेत्र नगरपालिकाका शिक्षा शाखाका प्रमुख देवेन्द्र मल्ले पालिकामा अरु बिद्यालयहरुलाई पनि अनुगमन गरी भवन उपलब्ध गराउन आग्रह गरेका थिए ।
भवन निर्माण कार्यमा सबैले सहयोग गरेको हुँदा यस विद्यालयमा गुणस्तर शिक्षा प्रदान गर्न शिक्षकहरुलाई अनुरोध गरेका थिए ।
प्लान नेपालका तिलक राईले विद्यालयहरुमा बालमैत्री बनाउन आफूहरु लागिपरेको बताए । राईले विद्यालयहरुमा लैङ्गिक रुपान्तरण शिक्षामा जोड दिनुपर्ने बताए ।
‘जग बलियो भयो भने घर बलियो हुन्छ,’ उनले भने, ‘बालबालिकाको गुणस्तर शिक्षामा सुधार गर्दै सबैसँग हातेमालो गरेर अगाडि बढ्नुपर्छ ।’
विद्यालयका प्रधानाध्यापक कुमार श्रेष्ठले आफूहरुको अथक प्रयासपछि एक वर्षपछि भवन निर्माण सम्पन्न गरेको बताए ।
सहयोगी हातहरुलाई धन्यवादसमेत व्यक्त गरेका थिए । विद्यालयलाई नमूना बनाउन लागिपरेकोसमेत बताए ।
दुई कोठे भवन निर्माणमा प्लान इन्टरनेसनल नेपालबाट २४ लाख २८ हजार, बराहक्षेत्र नगरपालिकाबाट चार लाख, बराहक्षेत्र नपा ८ नम्बर वडा कार्यालयबाट दुई लाख ७५ हजार, शिशु ज्योति विद्यालयबाट दुई लाख २५ हजार गरी कूल ३३ लाख २८ हजार लागतमा विद्यालय भवन निर्माण कार्य सम्पन्न भएको आरएसडीसीकी शिक्षा अधिकृत शिखाकिरण यादवले जानकारी दिइन् ।
आरएसडीसीकी शिक्षा अधिकृत यादवले परियोजनाको उद्देश्य, उपलब्धिका बारेमा प्रस्तुतिकरण गरेकी थिइन् ।
आरएसडीसीका अध्यक्ष रफुल अन्सारीको अध्यक्षतामा सम्पन्न भएको कार्यक्रममा गजेन्द्र यादवले सहजीकरण गरेका थिए ।
कार्यक्रममा शिक्षक, युवा, विद्यार्थी, अभिभावक लगायतको सरोकारवालाहरुको सहभागिता रहेको थियो ।
