इनरुवा । सुनसरीको भोक्राहा नरसिंहमा बलत्कार तथा किशोरी हिंसाविरुद्ध जनचेतनामूलक र्याली बिहीबार सम्पन्न भएको छ ।
च्याम्पियन अफ सोशल चेन्जिङ (सीओएससी) युवा संस्थाको आयोजना र भोक्राहा नरसिंह गाउँपालिका वडा नम्बर २ को सहयोग तथा भोक्राहा प्रहरी चौकी सुनसरीको समन्वयमा बलत्कार तथा किशोरी हिंसाविरुद्ध जनचेतनामूलक र्याली सम्पन्न भएको हो ।
जनचेतनामूलक र्यालीमा सहभागी भएका युवाहरुले ‘जलिनु पर्ने यहीँ, मारिनु पर्ने यहीँ अनि नांगिनु पर्ने पनि यहीँ, यस्तो छ स्वर्ग मानिने देशको मति, अनि कहिले आउँला सरकार तेरो नीति,’ ‘रुप फेसन र सुकिला कपडा छन् तर पनि बलात्कृत हुन् बाध्य छन्,’ ‘सरकार १ खै तेरो महिला, किशोरी अधिकार १’ छोरी चेलीले गर्छन् पुकार, नगरौं बालबिवाह, ल्याऔं सुधार १’ लगायत नारावाजी गर्दै भोक्राहा नरसिंह परिक्रमा गरेका थिए ।
भोक्राहा नरसिंह गाउँपालिका वडा नम्बर २ का वडाध्यक्ष आलम अन्सारीले किशोरीहरुले आयोजना गरेको र्याली कार्यक्रमले समाजमा परिवर्तन ल्याउन समाजका चेलीहरु सचेत हुन आवश्यक रहेको बताए ।
र्यालीपछि कोणसभालाई सम्बोधन गर्दै वडाध्यक्ष अन्सारीले देशमा बलत्कारका घटना दिनहुँ हुँदै गरेकाले समाजमा सबै सचेत हुनुपर्ने र बलत्कारीलाई सरकारले सजाय दिनुपर्ने मागसमेत गरेका छन् ।
च्याम्पियन अफ सोशल चेन्जिङ (सीओएससी) युवा संस्थाकी अध्यक्ष आफिया
बानोले भोक्राहा नरसिंहबाट सुरुवात गरेको दबाबमूलक कार्यक्रमले सार्थकता पाउने विश्वास व्यक्त गरिन् ।
किशोरी तथा महिलाहरु बलात्कार र हिंसामा परेको हुँदा राज्यले आपराधिकहरुलाई खोजी गरी कानुनी सजाय दिनुपर्ने उनले माग गरेकी छिन् । भोक्राहा नरसिंहमा समूहले जनचेतनामूलक तथा दबाब दिने कार्यलाई निरन्तरता दिनेसमेत अध्यक्ष बानोले बताइन् ।
कार्यक्रममा मनोज यादव, हजरत मन्सुरी, जियाउल हक, मुकेश यादव, सञ्जीत मेहता, रोशन मेहता, प्रहरी चौकीका इन्चार्ज जेपी बास्कोटा लगायत विभिन्न सरोकारवालाको सहभागिता रहेको थियो ।
