इनरुवा । सुनसरीको कोसी गाउँपालिकाको लौकहीमा जनता समाजवादी पार्टी कोसी कार्यसमिति सुनसरीले सरकारको विरुद्धमा मसाल जुलुस प्रदर्शन गरेको छ ।
जनता समाजवादी पार्टीका नेता तथा कार्यकर्ताहरुले लौकही बजारमा विभिन्न नाराबाजी गर्दै मसाल जुलुस प्रदर्शन गरेका हुन् ।
लौकही बजारमा मसाल जुलुस प्रदर्शन गरी कोणसभामा परिणत भएको थियो । प्रधानमन्त्री केपी शर्मा ओलीले गरेको कार्यप्रति असन्तुष्ट जनाउँदै जसपाले प्रधानमन्त्री ओलीले संसद् विघटन असवैधानिक कार्य गरेको हुँदा यथासीघ्र फिर्ता लिन मागसमेत गरेका थिए ।
कोणसभालाई सम्बोधन देवकृष्ण यादव उर्फ गोबर्धनले प्रधानमन्त्री केपी शर्मा ओली संविधान विरोधी भएको बताए । संसद् विघटन गर्नु नै असंवैधानिक र अलोकतान्त्रिक कार्य गरेको हुँदा जसपाले कुनै पनि हालतमा स्वीकार नगर्ने उनले बताए ।
संसद् विघटनले मधेस र लोकतान्त्रिक आन्दोलनबाट प्राप्त उपलब्धि खेर गएको उनको तर्क थियो । मधेसी अधिकार प्राप्तिका लागि पुनः आन्दोलनमा होमिनु परेको बताउँदैं अधिकारको लडाइँका लागि आफूहरु सडकमा ओर्लिन बाध्य भएको यादवले बताएका छन् ।
वर्तमान प्रधानमन्त्रीले चालेको कदम गैरजिम्मेवार भएकाले मधेसी जनता कसैको लोभ लालचमामा नपरी मधेसीको हक अधिकार प्राप्तिका लागि एकजुट हुन आवश्यक रहेको यादवको भनाइ छ ।
त्यसैगरी कोणसभालाई सम्बोधन गर्दै रामनारायण यादवले वर्तमान प्रधानमन्त्रीको विरुद्धमा आफूहरु सडकमा ओर्लिएको बताएका छन् ।
यादवले सुशासन, समृद्धि र विकासको नारा दिने प्रधानमन्त्री ओलीले संविधानको रक्षा गर्नुको साटो संसद् विघटन गर्नु नै असंवैधानिक भएको बताए ।
जो रक्षक उही भक्षक भन्ने नेपाली उखान टुक्का प्रयोग गर्दै यादवले संविधानको रक्षा गर्नु साटो संसद् विघटन गर्नु नै अलोकतान्त्रिक भएकाले आफूहरु लगातार सडक आन्दोलनमा उत्रेको बताए ।
जनता समाजवादी पार्टी कोसी गाउँपालिकाका अध्यक्ष विनोदकुमार यादवको अध्यक्षतामा सम्पन्न भएको मसाल जुलुसमा सयौं नेता तथा कार्यकर्ताको सहभागिता रहेको थियो ।
