इकवाल अहमद
इनरुवा । प्रदेश १ सरकारविरुद्ध अविश्वासको प्रस्ताव दर्ता भएपछि अल्पमतमा परेको मुख्यमन्त्री शेरधन राई प्रमुख प्रतिपक्षी दल कांग्रेसको समर्थन जुटाउन मंगलबार इनरुवाको एक होटलमा कांग्रेस नेतृत्वसँग भेटघाट गरेका छन् ।
नेकपा प्रचण्ड–नेपाल खेमाले प्रदेश १ मा मुख्यमन्त्री राईविरुद्ध अविश्वासको प्रस्ताव दर्ता गरेपछि सिर्जित राजनीतिक परिस्थिति र प्रदेश १ सरकारमा पर्ने असरलाई नियन्त्रण गर्न प्रदेश १ का मुख्यमन्त्री शेरधन राई अहिले दौडाहामा लागेको समाचार स्रोतले उल्लेख गरेको छ ।
सो क्रममा मंगलबार इनरुवाको फूलबारी होटलमा प्रदेश १ का मुख्यमन्त्री शेरधन राई र नेपाली कांग्रेसका केन्द्रीय नेता ज्ञानेन्द्रबहादुर कार्कीबीच लामो समयसम्म छलफल भएको छ ।
समाचार स्रोतका अनुसार सो छलफलमा मुख्यमन्त्री राईले आफ्नो नेतृत्वको सरकारलाई कांग्रेसले समर्थन गरे सरकार टिकिरहने र त्यसको सट्टा कांग्रेसले खोजेअनुसारको ‘स्पेस’ अर्थात् विभिन्न मन्त्रालयहरु दिने प्रस्ताव गरेको स्रोत बताउँछ ।
स्रोतका अनुसार राईका पक्षबाट कांग्रेसलाई चार मन्त्रालय दिनेसम्मको प्रस्ताव आएको थियो ।
प्रदेश १ मा कांग्रेसले वर्तमान मुख्यमन्त्री राईलाई समर्थन गरे सरकार टिकिरहने र अविश्वास प्रस्ताव स्वतः सकिने भन्दै नेकपा ओली नेतृत्वको सुझावअनुसार मुख्यमन्त्री राईद्वारा यस्तो प्रस्ताव आएको स्रोत बताउँछ ।
प्रदेश नं. १ मा प्रमुख प्रतिपक्षी दलको भूमिका निर्वाह गरिरहेको कांग्रेसले अल्पमतमा परेको वर्तमान प्रदेश सरकारलाई समर्थन गरे अन्य केहीको समर्थनमा सरकार टिकिरहने पक्कापक्की छ ।
यसै विषयलाई ग्यारेन्टी गराउन हिजो इनरुवा आइपुगेका मुख्यमन्त्री राईले कांग्रेस १ का प्रदेश इन्चार्जसमेत रहेका कार्कीसँग छलफल गरेको स्रोतको दावी छ ।
स्रोतका अनुसार छलफलमा कार्कीले केन्द्रको निर्देशन र सल्लाहपश्चात् कुनै पनि निर्णयमा पुग्ने बताउँदै आफूहरुको सहानुभूति रहेको प्रतिक्रिया दिएका थिए ।
यता, प्रदेश नं. १ प्रमुख प्रतिपक्षी दलका नेता राजीव कोइरालाले भने यसबारे आफूलाई ढिलो जानकारी आएको बताउँदै अहिले नै यसबारे केही बोल्न नमिल्ने भन्दै नेपाली कांग्रेसले केन्द्रदेखि लिएर जिल्लासम्म आन्तरिक सल्लाह र छलफल जारी राखेकाले बृहत हितको पक्षमा अगाडि बढ्ने बताए ।
