पवन रौनियार
लौकही । सुनसरीको कोसी गाउँपालिकास्थित कोसीटप्पु वन्यजन्तु आरक्षबाट निस्केको मकुना हात्तीले आक्रमण गर्दा फेरि एकजनाको मृत्यु भएको छ ।
सोमबार राती माकुना हात्तीले आक्रमण गर्दा कोसी गाउँपालिका वडा नम्बर ५ का अन्दाजी २७ वर्षीय मोतिकुमार कामतको घटनास्थलमै मृत्यु भएको स्थानीय अरुणकुमार मण्डलले बताएका छन् ।
कोसीटप्पु वन्यजन्तु आरक्षबाट निस्केका माकुना हात्तीको आक्रमणबाट मृत्युु भएका कामतलाई खोजतलास गर्दै जाँदा मंगलबार शव भेटाएको थियो ।
कामतको शव पहिचानपछि कोसी गाउँपालिकाका स्थानीयहरुले कोसी रिफ्रेसमेन्ट सेन्टरमा चार घण्टाभन्दा बढी महेन्द्र राजमार्ग अवरोध गरेका थिए ।
स्थानीयहरुले जिल्ला प्रशासन कार्यालय सुनसरी र कोसीटप्पु वन्यजन्तु आरक्षविरुद्ध विभिन्न नाराबाजी गर्दै सडक अवरुद्ध गरेका थिए ।
कोसी रिफ्रेसमेन्ट सेन्टर नजिकै सडकमा शव राखी स्थानीयहरुले सडक अवरुद्ध गर्दै नाराबाजी गरेका थिए ।
आन्दोलनलाई साम्य बनाउन कोसी गाउँपालिकाका अध्यक्ष ऐयुब अन्सारी र पन्चनारायण मण्डलले पीडित परिवार र स्थानीयहरुको छलफलपश्चात् सडक अवरुद्ध हटाएका थिए ।
यसअघि पनि मकुना हात्तीले एकजनाको ज्यान लिएपछि चितवनको विशेषज्ञ टोलीले चेकजाँच गर्दा माकुना हात्तीले आक्रमण नगर्ने निष्कर्ष निकाले पनि केही सत्ता बित्न नपाउँदै माकुना हात्तीले फेरि एक जनाको ज्यान लिएपछि स्थानीयहरु
आक्रोसित बनेका थिए ।
कोसी रिफ्रेसमेन्ट सेन्टर नजिक स्थानीयको सहभागिता आन्दोलनम बढ्दै गएपछि सुनसरीका प्रमुख जिल्ला अधिकारी फणिन्द्रमाणि पोखरेलविरुद्ध झन् चर्का नारावाजी सुरु भएको थियो ।
घटनालाई साम्य बनाउन र शवलाई पोस्टमार्टम गर्नका लागि उनीहरुले भूमिका खेलेपछि पुनः कोसी टप्पु वन्यजन्तु आरक्षमा पीडित पक्ष, स्थानीयवासी, प्रमुख जिल्ला अधिकारी, कोसीका अध्यक्ष, संघर्ष समितिलगायतको विभिन्न सरोकारवालाहरुको छलफलपछि १० बुँदे निर्णय गरेपछि आन्दोलन साम्य भएको थियो ।
सुनसरीका प्रमुख जिल्ला अधिकारी फणिन्द्रमणि पोखरेलले कोसीटप्पु वन्यजन्तु आरक्षबाट निस्केर आक्रमणबाट ज्यान गइरहेकोले हात्ती विज्ञ टोली बोलाउने र सिनियर विज्ञ टोलीहरुको सुझावले अगाडि बढ्ने बताए ।
कोसी गाउँपालिकाका अध्यक्ष ऐयुब अन्सारीले जंगली जनावरबाट हुने मानवीय क्षति रोकिनुपर्ने सरकारसँग माग गरेका छन् ।
जंगली जनावर पीडित संघर्ष समितिका संयोजक पञ्चनारायण मण्डलले कोसीटप्पु वन्यजन्तु आरक्षबाट निस्कने माकुना हात्ती पागल भएकाले हप्तैपिच्छे मान्छे मार्ने गरेकाले विज्ञ टोलीहरु आएपछि नेल लगाएर राख्ने वा हटाउनुपर्ने अथवा ठोस निर्णयको पर्खाइमा रहेको बताए ।
आरक्षलाई घेराबेरा गरी पूर्णरुपले संरक्षण नगरे धेरै मान्छेको ज्यान लिन सक्ने सम्भावना बढेको हुँदा आरक्षले समयमै ध्यान नदिए कडा अन्दोलन गर्ने चेतावनी दिएका छन् ।
