इनरुवा । संसद् विघटन भएपछि नेपाली कांग्रेसका केन्द्रीय सदस्य तथा पूर्व अर्थमन्त्री ज्ञानेन्द्रबहादुर कार्की पनि आफ्नो निर्वाचन क्षेत्रमा आएर विरोध सभालाई सम्बोधन गरिरहेका छन् ।
राष्ट्रपति विद्यादेवी भण्डारी र प्रधानमन्त्री केपी शर्मा ओलीले संसद् विघटन गरेको कार्य असवैधानिक र अलोकतान्त्रिक कदम चालेको भन्दै सांसद कार्कीले अहिले सुनसरी ४ नम्बर निर्वाचन क्षेत्रका जनतालाई सरकारले गरेका गतिविधिका बारेमा भन्दै जनताको गुनासो सुन्नमा ब्यस्त भएका छन् ।
मंगलबार सुनसरीको हरिनगर गाउँपालिकाको ४ र ५ मा ब्यस्त भए भने बुधबार बराहक्षेत्र नगरपालिका र रामधुनी नगरपालिकाका जनताहरुको गुनासो, सल्लाह र सुझाव संकलनमा व्यस्त भएका थिए ।
सुनसरी ४ नम्बर निर्वाचन क्षेत्रमा कार्कीले प्रत्यक्ष जनतासँग भेटघाट गरी गुनासो सुन्दै अगामी दिनमा कसरी जाने र कांग्रेस पार्टीलाई कसरी बलियो बनाउने विषयमा केन्द्रित रहेर जनता, नेता तथा कार्यकर्ताहरुसँग विशेष छलफल गरेका छन् ।
सुनसरीको बराहक्षेत्र नगरपालिका वडा नम्बर ६, ७, ८, ९ र १० र रामधुनी नगरपालिका वडा नम्बर ४ मा समेत नेता तथा कार्यकर्ताहरुसँग भेटघाट र जनताको गुनासो सुनेका थिए ।
निर्वाचनको समयमा जनताको घरदैलोमा गएर भोट मागेको र जनताले दिएको मतबाट आफू निर्वाचित भएको हुँदा जनताको गुनासो, समस्या, राय संकलन गरी अगामी दिनमा सुधार गर्ने उद्देश्यले जनतासँगको सम्बन्धलाई सुदृढ गर्नका लागि अहिले आफ्नो निर्वाचनमा समय दिएको सांसद कार्कीले बताएका छन् ।
समय–समयमा जनतासँग भेटघाट गरिरहेको र आएको गुनासो र समस्यालाई मध्यनजर गरी समाधान गर्नेतर्फ अग्रसर रहेको उनको कथन छ । विकासको कामदेखि जनताको भावनालाई कदर गर्दै अहिलेसम्म काम गरेको र अगामी दिनमा पनि जनताको साथमा रहेर काम गर्ने सांसद् कार्कीले प्रतिबद्धता व्यक्त गरेका छन् ।
सुनसरीको बराहक्षेत्र नगरपालिकामा जनतासँग भेटघाट गर्ने क्रममा ७ नम्बर वडाका ५० जनाभन्दा बढी विभिन्न पार्टी परित्याग गरी कांग्रेसमा प्रवेश गरेकाले उनीहरुलाई विशेष धन्यवादसमेत दिएका छन् ।
नवप्रवेशीहरुलाई अबिर र खादा लगाई स्वागत गरेका गर्दै सांसद कार्कीले मुलुकमा एकमात्र कांग्रेस पार्टीले निकास निकाल्न सक्ने भएको हुँदा समयमै कांग्रेसमा प्रवेश गरेकाहरुलाई यस क्षेत्रमा संगठनलाई मजबुत बनाउन आवश्यक रहेको बताए ।
