फाइल तस्बिर
इनरुवा । सुनसरीका अधिकांश उपशाखा नहरको मर्मत सम्भार नहुँदा पानी अभाव भएको छ । सुनसरी–मोरङ सिचाइँ योजनाको सुनसरी खण्डमा विभिन्न शाखा तथा उपशाखा नहरहरुको समयमा मर्मत सम्भार नहुँदा नहर भएर पनि पानी नआएको किसानहरुले गुनासो गरेका छन् ।
किसानका अनुसार हरिपुर शाखा नहर, सिसुवा शाखा नहर, शंकरपुर शाखा नहर, सीतागञ्ज शाखा नहर र भीमपुर शाखा नहर तथा उपशाखामा पानी प्रवाहम समस्या भएको छ ।
लामो समयदेखि मर्मत सम्भार नगरेको र पानी प्रवाहसमेत प्रयाप्त नगरेकाले किसानहरुलाई समस्या भएको गढी–३ का किसान सुरेन्द्र मेहताले गुनासो गरेका छन् ।
जिल्लाको पाँचवटा शाखा नहर र दर्जनभन्दा बढी उपशाखा नहर तथा माइनरहरुमा मर्मत सम्भार नहुँदा नहरको आधा बाटोबाटै पानी हराउने गरेको मेहताको गुनासो रहेको छ ।
सीतागञ्ज शाखा नहरमा प्रयाप्त पानी नछोडेको र छोडेको पानी औरावनी दक्षिण नपुगेकाले हजारौँ हेक्टर क्षेत्रफलको गहुँ र मकैं तथा तरकारी बालीमा सिचाइँ गर्न समस्या भएको अर्का किसान सियालाल यादवले गुनासो गरेँ ।
यादवका अनुसार ढिलो गरी पानी छोडेको र त्यो पानीसमेत आधा बाटोमै रहेकाले किसानहरु चिन्तित बनेका छन् । धान सिजनमा रोग किराबाट पीडित बनेका किसानहरु गहुँ सिजनमा सिचाइँ अभावका मारमा परेको बताइएको छ ।
गहुँ किसानहरु नहर भएर पनि पानी नहुँदा समस्या भएको गुनासो गरेका छन् भने केहीले भूमिगत पानी सिचाइँ गरिरहेको कोसी गाउँपालिका–४ का किसान विद्यानन्द यादवले बताए ।
यादवका अनुसार हरिपुर शाखाबाट आठ हजार हेक्टर क्षेत्रफलमा सिचाइँ गर्ने भनिए पनि अहिले लोकमार्गभन्दा दक्षिणतर्फ एकथोपा पनि पानी आएको छैन् ।
हरिपुर शाखा नहर बाढीकोे बेलादेखि नै प्रभावित हुँदै आएको छ भने सुकसैना शाखा नहरमा सुनसरी खोलाको बाढी र हरिनगरासम्मको क्षेत्रमा मात्रै पानी प्रवाह भएको छ ।
यता शंकरपुर शाखा नहरको इनरुवा दक्षिण नहर भएर पनि पानी प्रवाह नभएको गौतमपुरका किसान पवन मेहताले गुनासो गरेका छन् । मेहताका अनुसार बाढीको सिजनमा डुबानका लागि प्रर्याप्त पानी आए पनि अहिले सिचाइँका लागि पानी नआएकाले किसानहरु मारमा परेका छन् ।
यता, सीतागञ्ज शाखा नहरका जल उपभोक्ता समिति अध्यक्ष तपन दासले माथिबाटै आवश्यक पानी नआएकाले समस्या भएको प्रतिक्रिया दिएका छन् ।
दासले नहरका लागि आवश्यक पर्ने २० हजार क्युसेक पानीमा हाल पाँच हजार क्युसेक पानीमात्र चतराबाट प्रवाह भएकाले शाखा नहरमा प्रयाप्त पानी नआएको बताए ।
