इटहरी । नेपाल तरुण दल इटहरी उपमहानगर समितिले उपाध्यक्ष पदमा गरेकोे एउटा मनोनयन नेपाल तरुण दल जिल्ला कार्यसमितिले खारेज गरेको छ । गत पुष १२ गते नेपाल तरुण दल इटहरीले नगर उपाध्यक्षमा मनोनयन गरेका मनोज लिम्बुको मनोनयन विधान विपरित भएको ठहर गर्दै खारेज गरेको जानकारी नेपाल तरुण दल सुनसरीका अध्यक्ष सिजन गुरुङ्गले जानकारी दिए ।
कोरोना कहर पश्चात लामो समयको अन्तरालमा नगर र क्षेत्रिय अध्यक्ष तथा सचिव सहितको बृहत बैठकले तरुण दल सुनसरीका विभिन्न तहमा भएका मनोनयनहरुको जाँच गरी विधान विपरित देखिएका मनोनयन खारेज गरेको हो ।
इटहरीको नगर उपाध्यक्षमा मनोनित मनोज लिम्बु नेपाल तरुण दलको पुर्णकालिन सदस्य समेत नभएको अवस्थामा विधान र यसको मर्म बमोजिम तरुण दलको पदाधिकारी मनोनयन हुन नसक्ने ठहर गर्दै उक्त मनोनय खारेज गरिएको जानकारी इटहरी उपमहानगर समितिलाई समेत गराईएको तरुण दल सुनसरीले जनाएको छ ।
सुनसरी अनलाइनसँग कुरा गर्दै तरुण दल सुनसरीका अध्यक्ष सिजन गुरुङ्गले तरुण दलको विधान मिच्ने कार्य आफुलाई मान्य नहुने र सुनसरीभर जुनसुकै तहमा गरिने अबैधानिक मनोनयन जिल्ला समितिले खारेज गर्ने जानकारी दिए । नेपालकै सुदृढ संगठन भएको सुनसरी तरुण दलमा विवाद ल्याउने प्रपञ्च भईरहेको जानकारी दिदै अध्यक्ष गुरुङ्गले तरुण दलको विधान मिच्ने र संगठनमा विवाद ल्याउन पर्दा पछाडीबाट चलखेल भएको भन्दै तरुण दललाई कमजोर बनाउन खोज्नेहरु आफै समाप्त हुने चेतावनी दिए ।
नेपाली काँग्रेसले घोषणा गरेको आन्दोलनका कार्यक्रमहरु सफल बनाउन जुट्नुपर्ने बेलामा संगठन भित्र विवाद देखिनु राम्रो नभएको प्रतिक्रिया दिदै अध्यक्ष गुरुङ्गले इटहरी उपमहानगर समितिकै अध्यक्षको उपस्थितिमा अबैधानिक मनोनयलाई बर्खास्त गरेको र आगामी दिनमा संगठन सुदृढिकरण तथा विस्तार गर्दा गरिने मनोनयनमा विधानलाई पुर्ण परिपालना गर्न सचेत गराईएको जानकारी दिए ।
नेपाल तरुण दल सुनसरीको पत्र जस्ताको त्यस्तै ।
