इनरुवा । भोक्राहा नरसिंह गाउँपालिकाका अध्यक्ष महेन्द्र प्रसाद यादव बिरुद्ध प्रहरीमा उजुरी परेको छ ।
भोक्राहा नरसिंह–७ निवासी रमेश कुमार यादवले आफूलाई पालिकाका अध्यक्ष यादवले अभद्र ब्यवहार गरेको हुदाँ सुनसरी प्रहरीमा उजुरी दिएको बताए ।
भोक्राहा नरसिंह गाउँपालिका वडा नम्बर ७ मा रहेको कालीमन्दिरको विषयमा गाउँपालिका अध्यक्षको कार्यकक्षमा छलफलन गर्न गएको बेला रमेशलाई धक्का दिएर बाहिर निकालेको अध्यक्ष यादवमाथि आरोप छ ।
राष्ट्रिय युवा संघ सुनसरी सदस्य समेत रहेका रमेश कुमार यादवले पालिकामा गएर आफना भनाईहरु अध्यक्षसमक्ष राखने क्रममा पालिका अध्यक्ष यादवले आवेगमा आएर आफूलाई कोठा बाहिर धकेलेर निकालेको आरोप लगाएका छन् ।
पालिका अध्यक्षले रमेशलाई धक्का दिएर आफनै कोठाबाट बाहिर निकालेको सिसिटिभीमा पनि कैद भएको दृश्य सुनसरी अनलाइनले फेला पारेको छ ।
राष्ट्रिय युवा संघका केन्द्रीय सदस्य तथा सुनसरी इन्चार्ज देवानन्द मेहताले पालिका अध्यक्ष महेन्द्र प्रसाद यादवले गरेको अभद्र ब्यवहारप्रति घोर भत्र्सना गर्दै पालिकाको अध्यक्षले अभिभावकको भूमिका निर्वाह गर्नुपर्नेमा अभद्र ब्यवहार गर्नु सरासर गलत भएको प्रतिक्रिया दिएका छन् ।
पालिकाको अध्यक्ष भएर जनताको गुनासो सुन्नुपर्ने ठाउँमा उल्टै हातपात गर्नुले अभिभावकको जिम्मेवारी र दायित्व गुमाएकोले कार्वाही हुनुपर्ने मेहताको तर्क छ ।
राष्ट्रिय युवा संघ सुनसरी सदस्य यादवले कार्वाही गर्नुपर्ने माग राख्दै जिल्ला प्रहरी कार्यालय सुनसरीमा भोक्राहा नरसिंह गाउँपालिकाका अध्यक्ष महेन्द्र प्रसाद यादवले अभद्र ब्यवहार गरेको उजुरी दिएको र जसरी पनि कार्वाही हुनुपर्ने माग गरेका छन् ।
यता भोक्राहा नरसिंह गाउँपालिकाका अध्यक्ष यादवले आफू माथि लागेको आरोप निराधार भएको प्रतिक्रिया दिएका छन् ।
