इनरुवा । पूर्व अर्थमन्त्री एवं नेपाली कांग्रेसका केन्द्रीय सदस्य ज्ञानेन्द्रबहादुर कार्कीले संसद् विघटन गरेर मुलुकमा अधिनायकवाद लाद्न खोजेको आरोप लगाउएका छन् । कम्युनिस्ट सरकारले मुलुकमा संकट ल्याउन खोजेको बताउँदै कार्कीले अधिनायकवाद लाद्न खोजेको आरोप लगाएका हुन् ।
नेपाली कांग्रेसले शनिबार पूर्वघोषित सबै स्थानीय तहहरुमा विरोध प्रदर्शन गर्ने कार्यक्रमअन्तर्गत सुनसरीको बराहक्षेत्रमा आयोजित विरोधसभालाई सम्बोधन गर्दै कार्कीले सो कुरा बताएका हुन् ।
प्रतिनिधिसभा विघटनविरुद्ध आन्दोलन गरिरहेको कांग्रेसले पूर्वनिर्धारित कार्यक्रमअनुसार देशको सात सय ५३ वटै पालिकामा प्रदर्शन गरेको र देशमा संकट ल्याउन खोजेकाले त्यसको विरुद्ध काग्रेंस लागेको बताए ।
संसद् विघटनविरुद्ध प्रदर्शनमा उत्रेको कांग्रेसले संसद् पुनःस्थापना गर्नुपर्ने पक्षमा रहेको बताए । उनले पुस ५ गते प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरेपछि कांग्रेस देशव्यापी आन्दोलित बनेको र सरकार अधिनायकवादतर्फ उन्मुख भएकाले आन्दोलनमा उत्रेको बताए ।
विरोधसभालाई सम्बोधन गर्दै कार्कीले मुलुकमा संकट ल्याउन खोज्नेहरुको सपना पूरा हुन नदिनका लागि देशभर कांग्रेसले विरोधसभाको आयोजना गरेको बताए । मुलुकमा वर्तमान सरकारले अंसवैधानिक र अलोकतान्त्रिक कदमविरुद्ध नेपाली कांग्रेसले देशभर विरोधसभा गरेर अधिनायकवाद र सर्वसत्तावादका विरुद्ध आवाज उठाएको स्पष्ट पारे ।
वर्तमान सरकारले ‘समृद्ध नेपाल, सुखी नेपाली’ बनाउने नारा भनाइमा मात्र सीमित रहेकाले नेपाली जनताको पक्षमा कहिल्यै पनि कम्युनिस्ट उभिएको नदेखिएको आरोप लगाए । उनले भने, ‘कम्युनिस्ट सरकारले नारा दिएर लोकप्रियता कमाउन सफल भए पनि जनताको मन जित्न भने नसकेको अवस्था छ ।
’वर्तमान झन्झटिलो परिस्थितिको निर्माण केपी शर्मा ओली नेतृत्वको सरकारले सिर्जना गरेको भन्दै नेता कार्कीले समस्यालाई समाधान गर्नका लागि नेपाली कांग्रेस तयार रहेको बताए ।
संकटले देशमा दुर्घटनाको सम्भावना बढ्दै गएकोतर्फ इंगित गर्दै नेता कार्कीले मुलुकलाई सम्भावित दुर्घटनाबाट बचाउन र लोकतन्त्र तथा संविधानको रक्षाका निम्ति नेपाली कांग्रेस जनतामाझ आएको बताए ।
उनले देश बचाउने अभियानमा जनताको पूर्ण समर्थन नेपाली कांग्रेसले पाएको आभाष आफूले पाएको बताए ।
आसन्न निर्वाचनमा प्रजातन्त्र लोकतन्त्र र जनताको संविधानलाई पूर्ण रुपमा जीवित राख्न नेपाली जनताले कांग्रेसलाई नै छनौट गरी देशको नेतृत्व दिने भन्ने कुरामा आफू विश्वस्त रहेको बताउँदै कार्कीले त्याग, तपस्या र बलिदानबाट प्राप्त भएको संविधानलाई रक्षा गर्ने जिम्मेवारी नेपाली जनतामाझ एक पटक फेरि आएका कारण यसको जर्गेनाका निम्ति नेपाली कांग्रेसको विकल्प नरहेको बताए ।
यसैबीच सुनसरीको धरान, इटहरी, दुहवी, बर्जु, गढी, कोसी, भोक्राहा नरसिंह, हरिनगर, इनरुवा, देवानगञ्ज, रामधुनी र बराहक्षेत्रमा समेत विरोध प्रदर्शन र कोणसभा गरेको कोसी गाउँपालिकाका अध्यक्ष ऐयुब अन्सारीले जानकारी दिए ।
