टोमराज मेहता
इनरुवा। पूर्व अर्थमन्त्री तथा नेपाली कांग्रेसका केन्द्रीय सदस्य ज्ञानेन्द्रबहादुर कार्कीले अग्तिपीडितहरुलाई राहत उपलब्ध गराएका छन् । केही दिनअघि सुनसरीको हरिनगर गाउँपालिका–५ वसन्तपुर बंगाली टोलमा आगलागी हुँदा डेढ करोडभन्दा बढी क्षति पुगेको हुँदा उनीहरुलाई आइतबार खाद्यन्न सामग्रीसहित ग्याँस सिलन्डर र चुलो सेट उपलब्ध गराइएको छ ।
कार्की सुनसरी निर्वाचन क्षेत्र नम्बर ४ बाट प्रतिनिधिसभा सदस्यमा निर्वाचित भएका थिए । संसद् विघटन भएपछि उनले लगातार जनतासँग भेटघाट गर्ने क्रममा अग्निपीडितको दुःख मर्म र भावना बुझ्न सो ठाउँमा आइपुगेका थिए । आगलागी भएको ठाउँमा निरीक्षण गर्दै कार्कीले उनीहरुलाई खाद्यन्न सामग्रीसहित ग्याँस सिलन्डर र चुलो सेट उपलब्ध गराए ।
खाद्यन्न सामग्री पाएपछि उनीहरुले दुःखको घडीमा निवर्तमान सांसद कार्की खाद्यान्न सामग्रीसहित निरीक्षण गर्न आएकोमा आभार प्रकट गरे । ४ नम्बर कै निवर्तमान सांसद कार्की भए पनि यस क्षेत्रका जनताको समस्यालाई समाधान गर्ने प्रयत्न गरिरहेका छन् । उनले विकास निर्माण कार्यदेखि जनताको दुःख सुखमा साथ दिने विकासप्रेमी नेता भएकाले आफ्नो निर्वाचन क्षेत्रको जनतासँग निरन्तर भेटघाटलाई कायम राखेका हुन् ।
हरिनगर गाउँपालिका–५ वसन्तपुरको बंगाली टोलका नौ घरपरिवारलाई खाद्यन्न सामग्री उपलब्ध गराएको छ । कार्कीले रमेश मण्डल, विवेक मण्डल, मोहन मण्डल, पशुपति मण्डल, तपैन मण्डल, पृथ्वीचन्द मण्डल, माधव मण्डल, सुरेश मण्डल र मैतोलदेवी मण्डललाई जनही दुई बोरा चामल, पाँच केजी दाल, पाँच लिटर खानेतेल र एक सेट ग्याँस सिलन्डर तथा एक सेट चुल्हो सेट उपलब्ध गराएको बताए ।
कार्कीले आग्निपीडितको समस्या बुझ्दै अगामी दिनमा पनि आफूले सक्दो सहयोग गर्ने प्रतिबद्धता व्यक्त गरेका छन् । आगलागी भएको ठाउँमा निःशुल्क स्वास्थ्य शिविरको पनि आयोजना गरी निःशुल्क उपचार गराउन आफू लागिपरेको उनले बताए ।
आगलागी भएको खबर आउनेबित्तिकै आफू सुनसरी आएको बताउँदै उनले अग्निपीडितहरुको अवस्था, बस्ने ठाउँ, जाडोयाममा कसरी बसिरहेका छन् भन्ने विषयमा चासो राखेका थिए । उनीहरुसँग प्रत्यक्ष भेटघाट गरी समस्याको बारेमा सोधेका थिए । अग्निपीडितहरुले सबै ठाउँबाट सहयोग पाएको सुनाएका थिए ।
निवर्तमान सांसद कार्कीले निर्वाचन क्षेत्रको जनताको सुरक्षा प्रत्याभूति गराउनु र रक्षा गर्नु प्रमुख दायित्व भएको हुँदा आफू निरीक्षणसँगै राहत लिएर आएको बताए । जाडोयामको समयमा केही समस्या भए आफूलाई जानकारी गराए थप सहयोग गर्नेसमेत प्रतिबद्धता व्यक्त गरेका छन् ।यसैगरी आइतबार कार्कीले भोक्राहा नरसिंह वडा नम्बर ५, ६, ७ र ८ का जनताहरुसँग प्रत्यक्ष भेटघाट गरी राय संकलन गरेका थिए ।
यसैगरी वसन्तपुरमा नै अग्निपीडितहरुलाई आयका भुजा व्यापारी तथा सिरुवा मेला अष्टयाम समिति लौकही सुनसरीले समेत राहत सामग्री उपलब्ध गराएको छ । राहत सामग्रीमा ब्ल्यांंकेट, लत्ताकपडा, भाँडावर्तन, खाद्यन्न सामग्री उपलब्ध गराएको सञ्चारकर्मी पवन रौनियारले जानकारी दिए ।
