इनरुवा। प्रदेश १ का उद्योग, पर्यटन, वन तथा वतावरण मन्त्री जगदिशप्रसाद कुसियैतले वैशाख १७ र २७ गते नै चुनाव हुने भएको हुँदा सबैलाई ढुक्क रहन अनुरोध गरेका छन् ।वर्तमान सरकारले वैशाखमा चुनावको घोषणा गरेको हुँदा मतदानका लागि तयार रहन जनसमुदायलाई उनले आग्रह गरेका छन् ।
नेपाल कम्युनिस्ट पार्टी (नेकपा) भोक्रहा नरसिंह गाउँ कार्यकमिटीले होटल लोटसमा आयोजना गरेको अगुवा कार्यकर्ता भेलालाई सम्बोधन गर्दै समयमा निर्वाचन हुने दावी गरेका हुन् । कार्यक्रममा सहभागी भएका नेकपा कार्यकर्ताहरुलाई सरकारले घोषणा गरेको प्रतिनिधिसभा निर्वाचन समयमा हुने भएकाले जनसुमदायमा सोहीअनुसारको सूचना र सन्देश प्रवाह गर्न आग्रह गरेका थिए ।
उनले केही मुठ्ठीभर समूहले निर्वाचन समयमा हुँदैन कि भनेर भ्रम फैलाएकाले त्यसको पछि नलागी नेकपालाई मत दिई पुनः प्रधानमन्त्री केपी शर्मा ओलीको नेतृत्वमा सरकार बनाउन आवश्यक रहेको उनले अपिलसमेत गरे ।
उनले नेपाली जनताले नेकपाको काम हेरेर खुसी भएकाले अब सुखी नेपाली र समृद्ध नेपालको कल्पना पूरा हुने दावी गरे । उनले मधेसको विकास गर्ने र मधेसीको मुक्ति गर्ने पार्टीसमेत नेकपा भएकाले सबैले नेकपाको एजेन्डा मन पराएको जिकिर गरे । उनले नेकपा विकासप्रेमी, जनप्रेमी र सुशासनप्रेमी भएकाले नागरिकले सूर्य चिन्हमा नै फेरि मतदान गरी उम्मेवादरहरुलाई वियजी गराई पठाउनुपर्ने बताए ।
उनले निर्वाचनको बेला मतदान गर्न तयार रहन राष्ट्रिय युवा संघ, स्थानीय जनप्रतिनिधिहरु, समाजसेवीहरु, व्यापारी, राजनीतिज्ञलगायत सबै जनसमुदायमा अपिल गरेका थिए । उनले वर्तमान प्रधानमन्त्री केपी शर्मा ओली विकास गर्ने लोकप्रिय भएकाले नेकपाकै केही साथीहरुले काम गर्न बाधा गरेकाले ताजा जनादेशका लागि संसद विघटन गरेको टिप्पणीसमेत गरेका थिए ।
मन्त्री कुसियैतले सरकारले वैशाखमा मध्यावधि निर्वाचनमा जाने निर्णय गर्ने गरेलगत्तै निर्वाचन आयोगले तोकिएको समयमा निर्वाचन गराउन आफूहरू तयार रहेको समेत बताए ।
पुस ५ गते सरकारले संसद् विघटनका साथसाथै वैशाख १७ र २७ गते दुई चरणमा ताजा निर्वाचन गराउने गरी गरेको सिफारिस राष्ट्रपतिद्वारा अनुमोदन भएकाले तोकिएको मितिमा निर्वाचन हुने र त्यसमा मतदान गर्न तयार रहन अपिल गरेका थिए ।
कार्यक्रममा नेकपका नेता रेवतीरमण भणडारीले स्थानीय तहको हुने निर्वाचनमा सुनसरीमा ६ वटा सिट नेकपाको सुनिश्चित भएको दावी गरे । वैशाखमा हुने प्रतिनिधिसभाको निर्वाचनमा एकढिक्का भएर लाग्न अनुरोध गर्दै नेकपाको सूर्य चिन्ह प्रधानमन्त्रीको पक्षमा आउने भएकाले कोही कराउँदैमा नपाउने जिकिर समेत गरे ।
यसैगरी राष्ट्रिय युवा संघ भोक्राहा नरसिंहका संयोजक रमेशकुमार यादवले संसद् विघटन भएपछि विभिन्न पार्टीहरुले गरेको विरोधसभाको कुनै औचित्य नभएको बताए । यादवले प्रधानमन्त्री केपी शर्मा ओलीको पक्षमा सूर्य चिन्ह आउनेमा विश्वस्त रहन सबैलाई आग्रहसमेत गरे ।
यसैगरी युवा नेता देवानन्द मेहताले नेकपाको सरकारले विकासको लहर ल्याएको दावी गर्दै अब हुने निर्वाचनले पनि फुट भएका नेकपाको हालत जनताले देखाउनेसमेत जिकिर गरेका थिए ।
कार्यक्रममा नेकपाका खेमराज पोखरेल, रमेश श्रेष्ठ, तैयब हुसैन, मुरारी सुवेदी, सोमन भट्टराई लगायतले वर्तमान समयको बारेमा आआफ्नो धारण व्यक्त गरेका थिए । भोक्राहा नरसिंह गाउँपालिका चिरौली चौकमा भएको कार्यक्रममा नेकपा गाउँ कमिटिका सचिव रामकुमार मेहता, अनेरास्ववियु गाउँ कमिटी भोक्राहा, राष्ट्रिय युवा संघ गाउँ कमिटीका सदस्यहरुले समेत आफ्नो धारणा राखेका थिए ।
