टोमराज मेहता
इनरुवा । नेपाली कांग्रेसका केन्द्रीय सदस्य तथा पूर्व अर्थमन्त्री ज्ञानेन्द्रबहादुर कार्कीले सामाजिक एकता भएमात्र संगठन बलियो हुने बताएका छन् । नेपाली कांग्रेस वडा नम्बर–३ को वडाभेलालाई सम्बोधन गर्दै उनले त्यस्तो बताएका हुन् । 
‘सामाजिक एकता नै बल हो,’ उनले भने, ‘नेपाली कांग्रेसमा गुट–उपगुटको राजनीति नगरी एकढिक्का भएर कांग्रेसलाई मजबुत बनाउन आवश्यक छ ।’
तराई, पहाड र हिमालमा बसोबास गर्ने विभिन्न जातजाति, भाषा, सांस्कृति, भेषभुषाले सामाजिक एकता कायम हुन आवश्यक रहेकोसमेत बताए ।
सामाजिक एकता भएन भने विकास असम्भव रहेको उनले बताए । सामाजिक एकताले विकास थप मद्दत पुग्ने भएको हुँदा सबै क्षेत्रलाई समेटेर अगाडि बढेमात्र विकासमा फड्को मार्न सकिने बताउँदै कार्कीले राजनीति र विकास सँगसँगै लैजान आवश्यक रहेको बताए ।
‘मुलुकबाट दिनहुँ वैदेसिक रोजगारमा जाने युवाहरुको चाप बढ्दै गएको छ,’ उनले भने, ‘युवाहरुले श्रम पसिनाबाट कमाएको रकमबाट धेरैको घरपरिवार चलिरहेको छ । त्यसैले रोजगारको सिर्जना गर्न आवश्यक रहेको छ ।’
वैदेसिक रोजगारबाट कमाएको पैसाले मुलुकमा रेमिटान्सले अर्थतन्त्रमा सहयोग पुगेकोे हुनाले लगानीमैत्री बनाउन सकेमात्र विकासले गति लिन सक्ने कार्कीको भनाइ छ । विदेस गएर होइन, हाम्रो देशमा नै युवाहरु श्रम पसिना बगाएर स्वरोजगार बन्नतर्फ अग्रसर हुनुपर्ने र आत्मनिर्भर बन्नका लागि युवाहरुले पनि सामाजिक एकतासँगै अगाडि बढ्नुपर्ने उनको भनाइ छ ।
नेपाली कांग्रेस वडा–३ को वडा कार्यसमितिले आयोजना गरेको वडाभेलामा युवाहरुले राजनीतिमा युवाको पहुँच र विकासमा कांग्रेसले ध्यान दिनुपर्ने र युवाहरुलाई रोजगारमुखी बनाउन कांग्रेसले भूमिका बारे जिज्ञासा राख्दा निवर्तमान सांसद् कार्कीले युवाहरुको पहुँच पुर्याउन आफ्नो भूमिका रहने र अगामी दिनमा युवाहरुलाई पनि अवसर दिने बताएका छन् ।
त्यसैगरी पूर्वअर्थमन्त्री कार्कीले सुनसरीको इनरुवा नगरपालिका–४, ३ र ८ नम्बर वडाका जनतासँग प्रत्यक्ष भेटघाट गरी रायसमेत संकलन गरेका थिए ।
कार्कीले जनतासँग भेटघाटलाई निरन्तरता दिँदैै आफ्नो निर्वाचन क्षेत्रमा समय दिँदै जनताको राय संकलनमा ब्यस्त बनेका छन् ।
यसैगरी भोक्राहा नरसिंह गाउँपालिकामा आयोजित सत्यसङ कार्यक्रमलाई समेत सम्बोधन गरेका छन् । कार्यक्रममा महिलाहरुको उत्साहजनक सहभागिता रहेको थियो ।
नेपाली कांग्रेस इनरुवा वडा नम्बर–३ का वडा सभापति सुनोज निरौलाको अध्यक्षतामा कार्यक्रम सम्पन्न भएको वडाभेला कार्यक्रममा नेपाली कांग्रेसका नेता बौवालाल मेहता, विनोद मेहता, डा. इसराइल मन्सुरी, युवा, महिला लगायतको सहभागिता रहेको थियो ।
भोक्राहा नरसिंह वडा नम्बर–६ का ६९ वर्षिया मिरजा देवी मण्डलको मृत्यु भएपछि निवर्तमान सांसद कार्कीले आफनो श्रीमति नबिना राणा कार्की सहित सुनसरी खोलाको आर्यघाटमा श्रद्धाञ्जली दिन समेत आइपुगेका थिए ।
