इनरुवा । सुनसरीको इनरुवा नगरपालिकाका जनप्रतिनिधिहरुसँग सामी परियोजनाले एक दिने अन्तर्क्रिया कार्यक्रम सम्पन्न गरेको छ । इनरुवा नगरपालिकाको सभाहलमा बुधबार सुरक्षित वैदेसिक रोजगारका सम्बन्धमा जनप्रतिनिधिहरुसँग एक दिने अन्तर्क्रिया कार्यक्रम सम्पन्न गरेको हो ।
सामुदायिक विकास संस्था (सिडिओ) सुनसरीको आयोजना र इनरुवा नगरपालिका, हेल्भेटास, सामीको सहकार्यमा इनरुवामा जनप्रतिनिधिहरुसँग इनरुवा नगरपालिकामा वैदेसिक रोजगारको अवस्थाबारेमा अन्तर्क्रिया कार्यक्रममा छलफल गरेका थिए ।
वैदेसिक रोजगारमा गएका युवाहरुको घरपरिवारमा समस्या भएको खण्डमा जिल्ला प्रशासन कार्यालय सुनसरीमा रहेको आप्रवासी सूचना केन्द्रमा जनप्रतिनिधिहरुले पनि पठाई सहयोग गर्न आयोजकले अनुरोध गरेका छन् ।
इनरुवा नगरपालिकाका जनप्रतिनिधिहरुले वैदेसिक रोजगारमा जान चाहने युवाले सूचना लिएर सीप सिकेर जानुपर्ने भएको हुँदा आ–आफ्ना वडामा त्यस्ता कोही व्यक्ति भए आप्रवासी सूचना केन्द्रले सहयोग गर्ने भएकाले समयमा पठाई सहयोग गर्न कार्यक्रम संयोजक धीरज भट्टराईले अपिल गरेका छन् ।
जनप्रतिनिधिहरुको पनि भूमिका भएकाले वैदेसिक रोजगारमा ठगीमा परेका, विदेशमा अलपत्र परेका, सम्झौताअनुसार काम र तलब नपाएका, विदेशमा मृत्यु भएकालगायतको समस्या भएमा सूचना केन्द्रमा जानकारी गराउन कार्यक्रम संयोजक भट्टराईले उनीहरुलाई अनुरोधसमेत गरेका छन् ।
इनरुवा नगरपालिकामा सामी परियोजनाले कार्यक्रम सञ्चालन गरेको हुँदा वैदेसिक रोजगारसम्बन्धी कुनै पनि समस्या भएमा सामीका रिटर्नी स्वंयसेवक, सिडिओ सुनसरी र जिल्ला प्रशासन कार्यालय सुनसरीभित्र रहेको सूचना केन्द्रमा त्यस्ता मुद्दाहरु जनप्रतिनिधिहरुले जानकारी वा सूचना दिएमा फास्ट ट्रयाकबाट समस्या समाधान गर्न तयार रहेको उनको भनाइ छ ।
सामी परियोजनाका जिल्ला अधिकृत देवनारायण चौधरीले सहजीकरण गर्दै जनप्रतिनिधिहरुलाई वैदेसिक रोजगारको ऐन कुानुन, संविधानमा भएको व्यवस्था र परियोजनाको बारेमा स्पष्ट पारेका थिए ।
वैदेसिक रोजगारको क्षेत्रमा सामी परियोजनाले विशेषगरी सूचना, न्याय र सीपको क्षेत्रमा काम गरिरहेको चौधरीको भनाइ छ । उनका अनुसार सूचना, न्याय र सीपमा पहुँच पुर्याउनका लागि सामी परियोजनाले काम गरेको हुँदा जनप्रतिनिधिहरुको पनि अहम भूमिका भएकाले यस्ता मुद्दा आएमा सहयोग गर्न आवश्यक छ ।
