इनरुवा। सुनसरीको सदरमुकाम इनरुवामा आयोजित विशेष कार्यक्रमका बीच जिल्लाका कृषकहरुलाई पशु औषधि निःशुल्क वितरण गरिएको छ ।
इनरुवामा विगत लामो समय अघिदेखि सञ्चालित भारद्वाज भेट्स सप्लायर्स ३३ वर्ष पुगेको अवसरमा आयोजित औपचारिक कार्यक्रमका बीच प्रदेशका उत्कृष्ट कृषकहरुलाई निःशुल्क पशु औषधि वितरण गरिएको हो ।
इनरुवा नगरपालिकाको हलमा आयोजित कार्यक्रममा एक सयजना कृषकहरुलाई सम्मानस्वरुप औषधि वितरण गरिएको थियो ।
भारद्वाज भेट्स सप्लायर्सका सञ्चालक विष्णु निरौलाका अनुसार संस्थाले निजी क्षेत्रमा रहेका पशुपक्षी तथा माछालाई औषधि तथा भ्यासिन वितरण गरी तत्काल मृत्युबाट बचाउने र प्रदेश १ र २ का उत्कृष्ट माछा तथा पशुपालक कृषकलाई औषधि वितरण कार्यक्रम सञ्चालन गरेको बताए ।
यसरी आफूले गरेका कामबाट सम्मान पाएपछि किसानहरु पनि खुसी भएका छन् । सम्मान पाएपछि आफूहरुलाई थप जिम्मेवारीबोध भएको र यहाँ सिकेको कुरा अन्य किसानलाई पनि सिकाउने कृषकहरुले बताएका छन् । एक सय कृषकलाई निःशुल्क पशु औषधि बाँडिएको हो ।
इनरुवा नगरपालिकाका प्रमुख राजन मेहता, प्रमुख जिल्ला अधिकारी फणिन्द्रमणि पोखरेल, पशुपंक्षी तथा मत्स्य विकास निर्देशनालय प्रदेश १ का निर्देशक लेखराज दाहालका साथै पशु चिकित्सक र जिल्लास्थित सुरक्षा निकायका प्रमुखहरुको उपस्थिति रहेको थियो ।
कार्यक्रममा किसानहरुलाई बाँडिएको पशु औषधिमा दुध बढाउने, मुटु कलेजो दह्रो पार्ने र नाम्ले ठिक पार्ने रहेका छन् ।
