इनरुवा। इनरुवा नगरपालिकाका मेयर राजन मेहताले इनरुवा नगरपालिकाभित्र रहेका अटो रिक्साचालकको निःशुल्क स्वास्थ्य बीमा गर्ने तयारी भइरहेको बताएका छन् ।
इनरुवा नगरपालिकाभित्र अटो रिक्साचालकहरुले काम गर्दै आएकाले उनीहरुलाई निःशुल्क स्वास्थ्य बीमा नगरपालिकाबाट गर्ने तयारीमा आफूहरु जुटेको उनले बताए ।
गरिब तथा सीमान्तकृत परिवारसँग सम्बन्धित रहेका त्यस्ता परिवारहरुको कल्याणका निम्ति इनरुवा नगरपालिकाले यस्तो योजना ल्याएको मेयर मेहताको भनाइ छ । इनरुवा नगरपालिका क्षेत्रमा डेढ सयभन्दा बढी अटो रिक्साचालकहरुलाई निःशुल्क स्वास्थ्य बीमा गर्ने मेयर मेहताले उद्घोष गरेका छन् ।
मंगलबार सुनसरी अनलाइनसँगको कुराकानीमा उनले भने, ‘दिनभर ज्याला मजदुरी गरेर जीविकोपार्जन गरेर घरपरिवार चलाइरहेका अटो रिक्साचालकलाई निःशुल्क बीमा गर्नेछु ।’
इनरुवा नगरपालिकामा दिनभर व्यक्तिहरुलाई भाँडा लिएर ओसारपोसार गर्ने अटो रिक्साचालकलाई नगरपालिकाबाट निःशुल्क बीमा गर्ने र त्यसबाट लाभ लिन उनीहरुलाई अनुरोधसमेत गरेका छन् ।
नगरपालिकाका अटो रिक्साचालकलाई बीमा गरिदिए उनीहरुलाई स्वास्थ्य समस्या भए निःशुल्क उपचार गर्न पाउने सुविधा भएकाले आफूले बीमा गर्न लागेको बताए ।
आटो रिक्साचालकहरुलाई स्वास्थ्यमा समस्या हुँदा रकम अभावका कारण उपचार गर्न नसकेकाले उनीहरुलाई आर्थिक समस्याबाट मुक्त गर्नका लागि डेढ सयभन्दा बढी अटो रिक्साचालकलाई बीमा गर्ने उद्धेश्यले सुरुवात गरेको बताए ।
अटो रिक्साचालकहरुले आवश्यक कागजात लिएर नगरपालिकामा आए नगरपालिकाबाट निःशुल्क स्वास्थ्य बीमा गरिदिने प्रतिबद्धता व्यक्त गरेका छन् ।
एक जना बराबरको तीन हजार पाँच सय बराबरको बीमा गरिदिए उनीहरुले एक लाख बराबरको उपचार गर्ने व्यवस्था भएको हुँदा निःशुल्क स्वास्थ्य बीमा गर्न लागेको मेहताले बताए ।
यसअघि यातायात मजदुरहरुको पनि एक सयभन्दा बढीको निःशुल्क स्वास्थ्य बीमा गरिदिएको उनले बताए । स्वास्थ्य क्षेत्रमा खेलवाड गर्न नहुने बताउँदै मेयर मेहताले कोभिड १९ को बेलामा पनि नगरपालिकाले अहम भूमिका खेलेको बताए ।
स्वास्थ्य बीमाकर्ता वहाव अन्सारीले अटो रिक्साचालकहरुको तथ्याङ्क संकलन गर्ने कार्य जारी रहेको बताए ।
