लौकही। सुनसरीको कोसी गाउँपालिका–१ स्थित सीमा क्षेत्रबाट सशस्त्र प्रहरीले एक युवतीको उद्धार गरेको छ । विवाहको प्रलोभन देखाई भारतमा बेचबिखन गर्न लैजाँदै गर्दा सशस्त्र प्रहरी वल बिओपी लौकहीबाट खटिएको सशस्त्र प्रहरीको टोलीले बुधबार युवतीको उद्धार गरेको हो ।
ललाईफकाई भारततर्फ लैजाँदै गर्दा बुधबार धादिङ जिल्ला थाक्रे गाउँपालिका–१० बस्ने ध्रुव बर्तौलाकी १७ वर्षीय छोरी रोशनी बर्तौलाको कोसी गाउँपालिका–१ पुरीटोलको सीमा क्षेत्रबाट उद्धार गरेको बिओपी लौकही इन्स्पेक्टर अरुण पाण्डेले जानकारी दिए ।
ती युवतीलाई भारततर्फ बेचबिखन गर्ने उद्देश्यले लान खोज्ने भारत अररिया जिल्ला बसमतिया पञ्चायत–९ भैरवगञ्ज बस्ने २१ वर्षका मुस्तफालाई नियन्त्रणमा लिएको उनले बताए । बेचबिखन गर्ने उद्देश्यले लाँदै गर्दा ती युवतीको सीमा क्षेत्रबाट उद्धार गरी आवश्यक कानुनी कारबाहीका लागि उनीहरूलाई नेपाल प्रहरीको जिम्मा लगाएको इन्स्पेक्टर पाण्डेले जानकारी दिए ।
