लौकही । सुनसरीको कोसी गाउँपालिकामा मोबाइल स्वास्थ्य कार्यक्रम सुरु भएको छ । अपांगता रोकथाम तथा पुनस्र्थापना कार्यक्रम अन्तर्गत मोबाइल स्वास्थ्य कार्यक्रम अपांगता न्यूनीकरण गर्ने उद्देश्यले सुरुवात गरिएको बताइएको छ । पहिलो चरणमा कोसी गाउँपालिका क्षेत्रका स्वास्थ्यकर्मीहरु मोबाइल स्वास्थ्य कार्यक्रमसम्बन्धी तालिम दिदै उक्त कार्यक्रम सुरुवात गरिएको फोकल पर्सन राजकिशोर मेहताले जानकारी दिए ।
मातृ तथा बाल स्वास्थ्य समन्वयका लागि कोसी गाउँपालिका क्षेत्रका स्वास्थ्यकर्मीहरुलाई तीन दिने मोबाइल स्वास्थ्य तालिम दिइएको उनले बताए । कोसी गाउँपालिकाको आयोजना तथा करुणा फाउन्डेसन नेपालको सहकार्य र प्रदेश सरकारको समन्वयमा आयोजना गरिएको मोबाइल स्वास्थ्यसम्बन्धी प्रशिक्षकलाई प्रशिक्षण तालिममा १८ जनाको सहभागिता रहेको थियो ।
कोसी गाउँपालिकामा रहेका आठवटै वडाका स्वास्थ्य चौकी प्रमुखहरु, आठजना अनमी, स्वास्थ्य शाखा प्रमुख र फोकल पर्सन गरी सहभागीहरुलाई करुणा फाउन्डेसन र प्रदेश कार्यालयबाट आएका सहजकर्ताहरुले मोबाइल स्वास्थ्यसम्बन्धी तालिम दिएका थिए ।
सहभागीहरूलाई करुणा फाउन्डेसन नेपालका केन्द्रीय प्रोग्राम म्यानेजर रश्मी पौड्याल, प्रदेश कार्यालयका सिनियर प्रोग्राम अफिसर मजबुल आलम, मेडिक मोबाइल कम्पनीका म्यानेजर जगरनाथ बिष्ट, प्रदेश कार्यालयका प्रोग्राम अफिसर सगुन गुरुङलगायतले प्रशिक्षण दिएका थिए ।
अपंगता रोकथाम गर्न महिला गर्भवती भएको अवस्थादेखि नै ध्यान दिनुपर्ने भएकाले सुरुवाती चरणमा स्वास्थ्यकर्मीहरुलाई मोबाइल तालिम दिएको फोकल पर्सन मेहताको भनाइ छ । उक्त तालिमपश्चात् आठवटै स्वास्थ्य चौकीका अनमीलाई मोबाइल वितरण गरिएको र एक हप्ताभित्र ८० जना महिला स्वास्थ्य स्वयंसेविकाहरुलाई पनि वितरण गरिने उनले बताए ।
तालिममा सहभागी भएका अनमीहरुलाई कोसी गाउँपालिकाका अध्यक्ष ऐयुब अन्सारीले मोबाइल वितरण गरेका थिए । महिला स्वास्थ्य स्वयंसेविकाहरुले मोबाइलबाट म्यासेज गर्दै महिला गर्भवती भएको बारेमा जानकारी गराउनुका साथै उनीहरूका अवस्थाका बारेमा समय समयमा जानकारी गराउनेछन् ।
यदि कुनै महिला गर्भवती हुँदादेखि सुत्केरी भएसम्म कुनै प्रकारका समस्या भएको अवस्थामा गाउँपालिकाले उपचार गर्नेछ । अपांगता रोकथाम गर्न मोबाइल स्वास्थ्य कार्यक्रम प्रभावकारी हुने बताउँदै गाउँपालिका अध्यक्ष ऐयुब अन्सारीले अबदेखि गाउँपालिकालाई गर्भवती र सुत्केरीको तथ्यांक संकलन गर्दै सेवा प्रदान गर्न थप सहज हुने बताए ।
