टोमराज मेहता
इनरुवा । इनरुवा नगरपालिकाका पूर्वमेयर खेमराज पोखरेलले सुकुम्वासी समस्या समाधान गर्ने बताएका छन् । भूमी व्यवस्था, सहकारी तथा गरिबी निवारण मन्त्रालयले माघ १९ गते राजपत्रमा प्रकाशित सूचनाअनुसार नेपाल सरकारले भूमीसम्बन्धी समस्या समाधान गर्न आयोग गठन गर्दै उनलाई अध्यक्षमा मनोनित गरेको छ ।
भूमिसम्बन्धी समस्या समाधान आयोग सुनसरी जिल्ला कार्यसमितिको अध्यक्ष पदमा इनरुवा–५ का पोखरेलको अध्यक्षतामा तीन सदस्य जिल्ला कार्यसमिति चयन गरेको छ । सुनसरीमा यसअघि पनि पोखरेलले सुकुम्वासी समस्या समाधान आयोगका जिल्ला अध्यक्ष पदको जिम्मेवारी सम्हालेका थिए ।
‘आयोगको जिम्मेवारी पाएँ तर काम गर्न पाइन,’ उनले भने, ‘सर्वोच्च अदालतमा मुद्दा परेको हुनाले त्यस बेला सुकुम्वासी आयोगसम्बन्धी काम गर्न सकिएन ।’ सुकुम्वासी आयोगमा अध्यक्ष पदको जिम्मेवारी पाए पनि समस्या समाधान गर्न
नसकेको र पुनः सरकारले सुनसरी जिल्लाको अध्यक्षमा मनोनित गरको हुनाले भूमी व्यवस्थापनसम्बन्धी काम गर्ने र सुकुम्वासी समस्या समाधान गर्न आफू लागिपर्ने बताए ।
सुनसरी जिल्लामा रहेको सुकुम्वासीहरुको तथ्याङ्क संकलन गरी समस्या समाधान गर्न आफूहरु लागिपर्ने पोखरेलले बताए । उनका अनुसार स्थानीय पालिकाहरुसँग समन्वय गरी आवश्यकताअनुसार पालिका छनौट गरी सुकुम्वासीसम्बन्धी काम सुरु गरिनेछ ।
जिल्लाको समस्या पहिचान गरी सुकुम्वासी समस्या समाधान गर्न यस आयोगले इमान्दारिताका साथ काम गर्ने र सुकुम्वासीहरुलाई ऐलानी जग्गाअनुसार लालपूर्जा वितरणसमेत गर्ने उनले बताए । अव्यवस्थित बसोवासलाई व्यवस्थित गर्ने, सुकुम्वासीलाई लालपूर्जा वितरण गर्ने र पालिकाहरुसँग समन्वय गरी छलफल तथा बहस गरी काम सुरु गर्ने पोखरेलको भनाइ छ ।
सुनसरीको धरान उपमहानगरपालिका र बराहक्षेत्र नगरपालिकामा सुकुम्वासी समस्या समाधान गर्न काम सुरु भइसेकेको र अब जिल्लास्तरमा नेतृत्व दिएकाले चाँडोभन्दा चाँडो काम सुरु गर्ने पोखरेलले प्रतिक्रिया दिएका छन् ।
भूमीसम्बन्धी समस्या समाधान आयोग सुनसरी जिल्ला कार्यसमितिको विज्ञमा इटहरी उपमहानगरपालिका २० बस्ने सूर्यकुमार राई र सदस्यमा बराहक्षेत्र नगरपालिका वडा ८ बस्ने बद्रीनाथ घिमिरे चयन भएका हुन् ।
