हरिनगरा । सुनसरीको हरिनगर गाउँपालिकाका अध्यक्ष गफार अन्सारी मियाँले हरिनगर गाउँपालिकाभित्र निर्माणाधीन रहेका नौवटा पुलको अनुगमन गरेका छन् । हरिनगर गाउँपालिका वडा नम्बर–५, ६ र ७ अन्र्तगत नौवटा पुल निर्माणाधीन रहेको अवस्थामा अध्यक्ष अन्सारीसहितको टोलीले अनुगमन गरेको हो ।
हरिनगर–५, ६ र ७ मा वर्षायामको समयमा पानीको निकास नहुदाँ समस्या हुँदै आएकाले समस्या समाधान गर्नका लागि नौवटा पुल निर्माणाधीन अवस्थामा रहेको अध्यक्ष अन्सारीले बताए । ‘हरिनगर पालिकाको ठूलो समस्या सुनसरीको खोलाको पानीले यस क्षेत्रका सर्वसाधारणहरु डुबानमा पर्ने गरेका छन्,’ उनले भने, ‘सुनसरी खोलाको पानी र वर्षायामको पानीले आवतजावत गर्न समस्या भएकोले यस क्षेत्रमा नौवटा पुल निर्माणले समस्या समाधान हुन्छ ।’
आवतजावत गर्नका लागि कालोपत्रे सडक यस क्षेत्रमा बनिसकेको र केही ठाउँमा बन्न बाँकी रहेकाले केही महिनामा नै कालोपत्रे सडक बनेपछि यस क्षेत्रका जनतालाई आउजाउ गर्न सजिलो हुने उनले बताए ।
‘हरिनगर गाउँपालिकाको ७ नम्बर वडामा तीनवटा र ५ मा एउटा पुल निर्माणको कार्य सम्पन्न भएको र पाँचवटा पुल निर्माणाधीन अवस्थामा रहेको छ,’ उनले भने । पालिकाको ७ नम्बर वडाको तीनवटा पुल निर्माण कार्य सम्पन्न भइसकेको हुँदा यस बाटोबाट घुस्कीदेखि देवानगञ्ज आउजाउ गर्न पाँच मिनेट लाग्नेसमेत उनले बताए ।
यस क्षेत्रको बाटो पनि केही महिनामा कालोपत्रे सडक निर्माण कार्य सम्पन्न भएपछि आउजाउ गर्न सहज हुने र व्यापारिक केन्द्रको सदरमुकाम बनाउनका लागि आफूले देवानगञ्ज, हरिनगर र घुस्की बजारलाई जोड्नका लागि काम थालनी गरेकोसमेत उनले बताए ।
भुटाहाबाट भारतीय बजार बसमतिया, घुस्कीबाट भारतीय बजार घुर्ना र हरिनगरा हुँदै वसन्तपुरदेखि बसमतिया र घुर्ना बजार आउन अब कुनै समस्या नहुने उनले बताए । आफू जनप्रतिनिधि भएको साढे तीन वर्षमा यस क्षेत्रलाई विकासको हव बनाएको र व्यापारिक केन्द्र बनाउनका लागि अधारभूत आवश्यकता पूरा गरी विकासको लहर ल्याएकोसमेत उनको कथन छ ।
हरिनगर गाउँपालिकाका अध्यक्ष गफार अन्सारी, प्रमुख प्रशासकीय अधिकृत भक्तबहादुर खड्का र वडा नम्बर ६ का वडाध्यक्ष इसराईल अन्सारी र नेपाली कांग्रेसका सभापति शिवहरि श्रेष्ठसहितको टोलीले अनुगमन गरेको थियो ।
