इनरुवा। जनता समाजवादी पार्टीका वरिष्ठ नेता राजेन्द्र महतोले देशमा वैकल्पिक शक्तिको आवश्यकता रहेको बताएका छन् । लोकतन्त्र रक्षा र अधिकार पहिचानका लागि वैकल्पिक शक्तिको रुपमा जनता समाजवादी पार्टीलाई स्थापना गर्नुपर्नेमा जोड दिएका छन् ।
सुनसरीको इनरुवामा आयोजित जिल्ला स्तरीय अगुवा कार्यकर्ता भेटघाट कार्यक्रमलाई सम्बोधन गर्दै वरिष्ठ नेता महतोले जनताले वैकल्पिक शक्तिको खोजीमा रहेकाले आफूहरुले जनता समाजवादी पार्टीलाई वैकल्पिक शक्तिको रुपमा प्रस्तुत गर्ने बताएका छन् ।
जनता समाजवादी पार्टीले शक्ति निर्माणको प्रक्रियालाई सुरु गरेको बताउँदै वरिष्ठ नेता महतोले तराई, पहाड, हिमालका जनताले अधिकार पहिचानका लागि राष्ट्रिय मुक्तिको आन्दोलन गर्नुपर्ने बताए । नेपाली कांग्रेस र कम्युनिस्ट पार्टी छाडेर यता सबै पार्टीहरु मिलेर राष्ट्रिय मुक्तिको आन्दोलन गर्न आवश्यक रहेको उनले बताए ।
आन्दोलनको तयारी गर्नुपर्ने नेता तथा कार्यकर्ताहरुलाई आग्रह गर्दै अहिले प्रधानमन्त्री केपी शर्मा ओलीले गरेको संसद् विघटनविरुद्ध एकजुट भएर आन्दोलन गर्नुपर्ने जिकिरसमेत उनले गरे ।
जनता समाजवादी पार्टीको एजेण्डामाथि जसले समर्थन गर्छ उतै जाने संकेत गर्दै वरिष्ठ नेता महतोले संविधान संशोधन भएमात्र मधेशी जनताको अधिकार पहिचान स्थापित हुने बताए ।
अहिले परिस्थितिमा जनता समाजवादी पार्टीले उठाएको एजेण्डामाथि नेपाली कांग्रेस वा कम्युनिस्टले समर्थन ग¥यो भने संयुक्त आन्दोलनबाट अगाडि बढ्ने बताए ।
‘प्रतिगमनको विरुद्धमा संघर्ष गर्न आवश्यक रहेको छ,’ उनले भने, ‘अधिकार पहिचान, सुशासन, समृद्धिका लागि आफू राष्ट्रिय मुक्ति आन्दोलनबाट देशको वैकल्पिक शक्तिको रुपमा स्थापित गर्नुपर्छ ।’
जनता समाजवादी पार्टीले दुई वटा जिम्मेवारीलाई पूरा गर्ने दायित्व भएको उनले बताए । लोकतन्त्रको रक्षा गर्ने र अधिकार, पहिचान, सुशासन, समृद्धिको एजेण्डालाई पूरा गर्ने ठूलो जिम्मेवारी जसपाको काँधमा रहेकोसमेत उनले बताए ।
सोही कार्यक्रममा त्रिलोकनाथ गुप्ता सहित ५० जनाले विभिन्न पार्टी परित्याग गरी जनता समाजवादी पार्टी सुनसरीमा प्रवेश गरेका छन् । नवप्रवेशीहरुलाई पार्टीका वरिष्ठ नेता राजेन्द्र महतोले फुलमाला र अविरको टिका लगाई स्वागत गरेका थिए ।
