इनरुवा । सुनसरी सदरमुकाम इनरुवा –४ मा निर्मित इनरुवा बसपार्क चार वर्ष बित्दा पनि सञ्चालन नभई त्यहाँ प्रादेशिक प्रहरी अस्प्ताल स्थापना गर्ने चर्चा सुरु भएपछि बसपार्क निर्माणका निम्ति जग्गा दिने दाताहरु आन्दोलित बनेका छन् ।
निर्माण भएको लामो समय बिते पनि त्यहाँ बसपार्क सञ्चालन नभई सोको सट्टा इनरुवा नगरपालिकाले नेपाल प्रहरीको प्रादेशिक अस्पतालको रुपमा सो क्षेत्रलाई प्रयोगमा ल्याउने घोषणा गरेपछि सो क्षेत्रमा जग्गादाता आन्दोलित बनेका हुन् ।
उक्त क्षेत्रमा बसपार्क निर्माणका निम्ति सो क्षेत्रका जग्गाधनीहरुले निःशुल्करुपमा जग्गा उपलब्ध गराएपछि त्यहाँ इनरुवा बसपार्कको टर्मिनल निर्माण सम्पन्न भएको हो । तर केही अज्ञात विवादका कारण त्यहाँ हालसम्म बसपार्कको सञ्चालन हुन सकेको छैन ।
जग्गादाताहरुले जुन प्रयोजनका निम्ति जग्गा दिइएको हो, त्यहाँ सोही प्रयोजनलाई लागू गर्न माग गर्दै अन्य प्रयोगजनमा त्यसलाई प्रयोग गरे आफूहरुलाई मान्य नहुने चेतावनीसमेत दिएका छन् ।
इनरुवा नगरपालिकाले नगरवासी तथा वडावासीसँग कुनै सरसल्लाह नगरी प्रादेशिक अस्पताल बनाउनका लागि सिफारिस दिएको भन्दै त्यसको विरुद्ध आन्दोलन गर्ने तयारीमा आपूmहरु जुटेको जग्गादाताहरुको भनाइ छ ।
सो क्षेत्रमा अस्पताल सञ्चालन गर्ने कुरा बाहिरिएपछि असन्तुष्ट बनेका जग्गादाताहरु ले पत्रकार सम्मेलनको आयोजना गरी प्रहरी प्रादेशिक अस्पताल निर्माणको निर्णय फिर्ता लिनुपर्ने र यथासिघ्र बसपार्क सञ्चालन गर्नुपर्ने माग गरेका छन् ।
इनरुवा–४ डिकबहादुर कार्कीले समेत बसपार्क सञ्चालन गर्नुपर्ने माग गरेका छन् । प्रादेशिक अस्पतालको बारेमा आफूहरुसँग कुनै सरसल्लाह नभएकाले १२ करोडको लागतमा बनेको बसपार्क नै सञ्चालन गर्नुपर्ने जिकिर गरेका छन् ।
त्यसैगरी स्थानीय जीवानन्द झाले पनि बसपार्क सञ्चालनको विकल्प नरहेको बताए । बसपार्क सञ्चालन नगरी प्रादेशिक अस्पताल बनाउनु सरासर गलत भएको बताउँदै बसपार्ककै लागि उपयुक्त भएको ठाउँलाई अरु कुनै पनि कार्य सञ्चालन गर्न नपाउने बताए । 
प्रादेशिक अस्पताल नै बनाउने भए इनरुवा–४ मा ऐलानी जग्गा प्रशस्त रहेकाले अरु ठाउँमा नै बनाई तत्काल बसपार्क सञ्चालन गर्नुपर्ने माग गरेका छन् । पत्रकार सम्मेलनमा स्थानीयहरुले प्रादेशिक अस्पताल सञ्चालन गरे आफू कानुनी उपचारका लागि न्यायालय जाने र आन्दोलन गर्ने चेतावनीसमेत दिएका छन् ।
