हरिनगरा । सुनसरीको हरिनगर गाउँपालिका–१ स्थित भुटाहा जेनरल हस्पिटलमा पाँच शैयाको कोभिड १९ अस्थायी अस्पतालको उद्घाटन भएको छ । भुटाहा जेनरल हस्पिटलमा यसअघि क्वारेन्टाइन र आइसोलेसन सञ्चालनपछि बिहीबार एक कार्यक्रमबीच उद्घाटन गरिएको हो ।
कोरोनाका बिरामीलाई उपचार गर्ने उद्देश्यले हरिनगर गाउँपालिकाले पाँच शैयाको कोभिड अस्पतालबाट सेवा सुचारु गर्ने गरी सुनसरीका प्रमुख जिल्ला अधिकारी फडिन्द्रमणि पोखरेल र हरिनगर गाउँपालिकाका अध्यक्ष गफार अन्सारी मियाँले संयुक्तरुपमा उद्घाटन गरेका हुन् ।
कार्यक्रमका प्रमुख अतिथिसमेत रहेका सुनसरीका प्रमुख जिल्ला अधिकारी पोखरेलले हस्पिटलमा क्वारेन्टाइन र आइसोलेसनसमेत सञ्चालन भइसकेको हुनाले कोभिड अस्पतालबाट यस क्षेत्रका कोभिड बिरामीलाई उपचार गर्ने उद्धेश्यले पाँच शैयाको अस्पताल सञ्चालन गरेको बताए ।
कोभिड बिरामीलाई अन्यत्र उपचार गर्न जानुपर्ने झन्झटबाट मुक्त गर्नका लागि भुटाहा जेनरल अस्पतालमै तत्काल पाँच शैयाको अस्पतालबाट सेवा प्रवाह गर्ने प्रजिअ पोखरेलले बताए । सुनसरीको दक्षिणवर्ती क्षेत्रकै राम्रो सुविधा सम्पन्न भवन रहेकाले यहाँको अस्पतालाई छनौट गरी कोभिड अस्सपताल बनाएको उनको कथन छ ।
यस अस्पतालमा स्वास्थ्यकर्मीहरुले निर्धक्कसँग काम गर्न अनुरोध गर्दै प्रजिअले कुनै हिचकिचाहाट नगरी स्वास्थ्यकर्मीलाई हरिनगर गाउँपालिकाको भुटाहा जेनरल हस्पिटलमा काम गर्नका अनुरोध गरेका छन् । ‘स्वास्थ्यकर्मी इनरुवादेखि दक्षिण आउन मानेका छैनन्,’ उनले भने, ‘इनरुवादेखि दक्षिणवर्ती क्षेत्रमा रहेको हरिनगर गाउँपालिका पनि विकसित भएको छ ।
’ त्यसैले सुविधासम्पन्न रहेकाले यस अस्पतालमा आउने चिकित्सकहरुले बुझ्ने कुरा भएको उनले बताए । उद्घाटन गर्दै प्रजिअ पोखरेलले हरिनगर गाउँपालिकाकाभित्र शिक्षा र स्वास्थ्य क्षेत्रमा अनुगमन गर्नुपर्ने आवश्यकता रहेको बताए ।
यसैगरी हरिनगर गाउँपालिकाका अध्यक्ष गफार अन्सारी मियाँले भुटाहा जेनरल हस्पिटललाई पाँच शैयाको कोभिड अस्पतालबाट कोभिड बिरामीहरुलाई उपचारका लागि बनाइएको बताए । यस अस्पताललाई पाँच शैयाको अस्पतालको स्वीकृत दिए पनि यस अस्पतालमा ५० जनाको क्षमता भएको अस्पताल भएको उनले बताए ।
तत्काल पाँच शैयाको अस्पतालबाट सुरु गरेकाले आवश्यकता परेको खण्डमा ५० जनासम्म राखी उपचार गर्नेसमेत बताए । हरिनगर गाउँपालिकाका प्रमुख प्रशासकीय अधिकृत भक्तबहादुर खड्काले सरकारले पहिलो चरणको खोप कार्यक्रम सञ्चालनमा ल्याएकाले कोभिडबाट बच्नका लागि खोप लगाउनुपर्ने बताएका छन् ।
कोभिड अस्पतालले कोशेढुङ्गाका रुपमा महत्वपूर्ण योगदान पु¥याउने उनले बताए । कोभिड अस्पतालले थप सुरक्षित तरिकाले उपचार गर्ने लक्ष्य लिएको हुँदा कोभिड बिरामीलाई राम्रो सेवा सुविधा प्रदान गर्ने प्रतिबद्धता उनले व्यक्त गरेका छन् ।
हरिनगर गाउँपालिकाका स्वास्थ्य शाखाका प्रमुख प्रकाश थापा मगरले कोरोनाको महामारी बेला यस अस्पतालबाट एक सय ९२ संक्रमित व्यक्तिहरुलाई निको पारेर घर फर्काएको बताउँदै मगरले अब कोभिड अस्पतालबाट पनि गुणस्तरीय सेवा प्रवाह गर्ने बताए ।
कार्यक्रममा पालिकाकी उपाध्यक्ष रिमझिमकुमारी भगत, सात वटै वडाध्यक्षहरु, कार्यपालिका सदस्य सुशील ठाकुर, शिक्षा शाखाका अजितकुमार मल्लिकलगायत सरोकारवालाहरुको सहभागिता रहेको थियो ।
