इनरुवा । मानव अधिकारवादी नेता कृष्ण पहाडीले वर्तमान प्रधानमन्त्री खड्गप्रसाद ओलीले संस्द विघटनसँगै संविधानमा आगो लगाएको आरोप लगाएका छन् । सुनसरीको इनरुवामा आयोजित मधेसी नागरिक समाजको अन्तक्र्रियालाई सम्बोधन गर्दै पहाडीले प्रधानमन्त्री केपी शर्मा ओलीले संसद् विघटनसँगै संविधान र आफ्नै दलमा आगो लगाएको आरोप लगाएका छन् ।
नेपालमा जनताले दाहसंस्कार गरिसकेका राजावादीहरुसमेत केपी शर्मा ओलीको कदमले सलबलाउन थालेको उनले बताए । ‘जनताको अधिकारहरु जोखिममा परेका छन्,’ उनले भने, ‘केपी शर्माले संविधानमा आगो लगाए ।
चोरले पनि तीन घर छाडेर चोरी गर्छन् तर केपी शर्मा ओली अल्पमतमा परेर आफ्नै दलमा आगो लगाए, संसद्मा आगो लगाए र संविधानमा आगो लगाएर देशलाई अस्तव्यस्त बनाए ।’
‘देशमा चरम निराशामा छन्,’ उनले भने, ‘दलहरुप्रति नागरिक खुसी छैनन् । कुशासनका कारण नागरिक खुसी छैनन् ।’ नेपाल कम्युनिस्ट पार्टीमा लेनदेनका कारण विवाद उत्पन्न भएको उनले बताए । ‘नेपाली जनता नजिक भएर सबैलाई नियालेर हेरिरहेका छन्,’ उनले बताए । वर्तमान प्रधानमन्त्री ओलीले बोलेको कुनै ठेगान नभएको पहाडीले जिकिरसमेत गरे ।
संसद् विघटन गरेपछि सबै संयन्त्रहरु प्रधानमन्त्री ओलीले आफ्नो कब्जामा लिएकाले देश कुनै बेला पनि ठूलो दुर्घटना हुन सक्ने संकेत गर्दै ओलीको बोलीमाथि भरोसा नभएको पहाडीको कथन छ । प्रधानमन्त्रीले जसरी संस्द विघटन गरे त्यसैरी नै आफ्नो शासन लागू गरेर चुनाव गराएर अराजकता ल्याउन खोजेकोसमेत उनले आरोप लगाए ।
विभिन्न समयमा ओलीले विवादास्पद अभिव्यक्ति व्यक्त गरेर देशमा द्वन्द्व निम्ताउन खोजेको हुनाले उनको वचनको कुनै टुङ्गो नहुनेसमेत नेता पहाडीको भनाइ छ । अन्तक्र्रिया कार्यक्रममा पहाडीले वर्तमान प्रधानमन्त्रीले गरेको कार्यहरुको विरोध मात्रै गरेका छन् । संसद् विघटन असंवैधानिक र अलोकतान्त्रिक कदमविरुद्ध नागरिक समाज एकजुट भएर अगाडि बढ्नुपर्ने उनको भनाइ छ ।
नेपाली कांग्रेस सुनसरीका सभापति एवं १ नम्बर प्रदेशका प्रमुख प्रतिपक्षी दलका नेता राजीव कोइरालाले संसद् विघटनविरुद्ध नागरिक समाजले गाउँकेन्द्रित हुँदैै जिल्लामा अग्रसर हुनुपर्ने बताए । देशमा परिवर्तन ल्याउनेहरुले नै संसद् विघटन गरेको आरोपसमेत उनले लगाए । संसद् विघटनविरुद्ध जनतालाई अन्दोलनमा होमिन उनले आग्रह गरे ।
निवर्तमान सांसद सीताराम मेहताले वर्तमान प्रधानमन्त्री केपी शर्मा ओलीले जनताको अधिकारबाट बञ्चित गराएको बताए । संसद् विघटनविरुद्ध जनता सडकमा जुर्मुराएर आएकाले संसद् पुनःस्थापना हुनेमा विश्वास व्यक्त गरे ।
मधेसी नागरिक समाजका सहजकर्ता तथा पत्रकार रामरिझन यादवले मातृभाषालाई संरक्षण र सम्बद्र्धन गर्नुपर्ने बताउँदै संसद् पुनस्र्थापना गर्नुपर्नेमा जोड दिएका छन् ।
यादवले मातृभाषा मैथिलीलाई प्रोत्साहन गर्दै मधेसका जनताले मधेसी भाषामा बोले राम्रो हुने बताए । मधेसी नागरिक समाज कुनै पनि संस्थामा आबद्ध नभएको उनले बताए । देश विकट परिस्थितिमा गुज्रिरहेको बेला मधेसी नागरिक समाजले नेतृत्वदायी भूमिका निर्वाह गरेकोसमेत उनले बताए ।
कार्यक्रममा नागरिक समाजका अगुवा देवराम मधेसीले संसद् विघटन असवैधानिक भए पनि तोकिएको निर्वाचनमा भने सबै सहभागी हुनुपर्ने बताए । उनले संविधान निर्माण भएपछि उत्पीडित जाति समुदायले समतामूलक समाजको कल्पना गरेपनि त्यसो नभएकोमा चिन्ता व्यक्त गर्दै जनताको जनादेश लिन निर्वाचन उपयुक्त माध्यम भएको बताए ।
त्यस्तैै शिक्षक लिलानाथ सिलवालले निर्वाचन जनताको जनमतका लागि भएकाले निर्वाचन गर्दा सबै नागरिक सहभागि हुनुपर्नेमा जोड दिए । त्यस्तै अधिकारकर्मी चुन्नी खातुनले संविधानको रक्षाका लागि संसद् पुनस्र्थापना जरुरी रहेको बताइन् । उनले संसद् विघटन गरेर जनता र संविधान दुवैलाई अपमान गरेकाले त्यसलाई सच्याउन जरुरी रहेको दाबी गरिन् ।
जयकृष्ण यादवको अध्यक्षतामा सम्पन्न कार्यक्रममा नेपाली कांग्रेस इनरुवा नगर कार्यसमितिका सचिव धिरज भट्टराई, इनरुवा जेसीजका अध्यक्ष संयम कोइराला, पत्रकार ताविल अन्सारी, पुरुषोत्तम घिमिरे, रमेश भट्टराई, अहिल्यादेवी मेहता लगायतको सहभागिता रहेको थियो ।
