इनरुवा । अस्पताल सुधार संघर्ष समितिले तय गरेको आन्दोलन अनुसार बिहीबार धर्ना कार्यक्रमको नाममा सार्वजनिक क्षेत्रमा अवरोध पुर्याएको कारण सुनसरी प्रहरीले इनरुवा बजारबाट चारजनालाई पक्राउ गरेको छ ।
अस्पताल सुधारका लागि इनरुवाका युवाहरुले गठन गरेको अस्पताल सुधार संघर्ष समितिले २५ बुँदे माग राखी जिल्ला प्रशासन कार्यालय सुनसरी, इनरुवा नगरपालिका र १ नम्बर प्रदेशका मुख्यमन्त्रीलाई ज्ञापनपत्र बुझाएका थिए ।
संघर्ष समितिले अस्पताल सुधार नभए आन्दोलनको चेतावनी समेत दिएको थियो । पूर्वघोषित कार्यक्रमअनुसार संघर्ष समितिले इनरुवाको लोकतान्त्रिक चोकमा विभिन्न नारावाजी गर्दै धर्नामा बसेका संघर्ष समितिको संयोजक दिलिपचन्द साहुसहित धर्मवीर आर्य, त्रिलोकचन्द गुप्ता र दिपेन्द्र साहलाई प्रहरीले पक्राउ गरेको छ ।
सर्वसाधारण नागरिकको आवतजावतको अधिकारलाई कुण्ठित गर्दै सार्वज्निकस्थलमा अवरोध गरेपछि कानुनअनुसार उनीहरुलाई पक्राउ गरिएको सुनसरी प्रहरीको भनाइ छ । यता, पक्राउ परेका चारैैजनालाई निसर्त रिहाइको माग गर्दै जनता समाजवादी पार्टी नेपाल सुनसरीले विज्ञप्ति जारी गरेको छ ।
जसपा सुनसरीका अध्यक्ष रामनारायण यादवद्वारा हस्ताक्षरित प्रेस विज्ञप्तिमा संविधानद्वारा प्रदत्त अभिव्यक्ति स्वतन्त्रताको अधिकार, शान्तिपूर्ण भेलासभा गर्न पाउने नागरिकको मौलिक अधिकारको ठाडो उल्लघंन गर्दै विनाकारण पक्राउ गरेकोप्रति खेद प्रकट गरेका छन् ।
जसपाका केन्द्रीय सदस्यसमेत रहेका साहु र अन्य जसपाका नेता तथा कार्यकर्ताहरु भएकाले अविलम्ब रिहाई गर्नुपर्ने माग राखेका छन् ।
पक्राउ परेका चारैजनालाई निसर्त रिहाई नगरिए जसपा सुनसरीले थप आन्दोलनको तयारीमा जुट्ने चेतावनी समेत दिएका छन् ।
