कोसी । सुनसरीको कोसी गाउँपालिका–३ मा कोसी महोत्सवलाई सफल बनाउनका लागि सोमबारदेखि दंगल कुस्ती सुरु भएको छ ।
आइतबारदेखि सुरु भएको कोसी महोत्सवलाई आकर्षित बनाउन हिजोबाट दंगल सुरु भएको बताइएको छ । कोसीटप्पु वन्यजन्तु आरक्षको क्षेत्रमा राष्ट्रिय कुस्ती प्रतियोगिता सोमबार सम्पन्न भएपछि दंगल कुस्ती सुरु भएको कोसी गाउँपालिकाले जनाएको छ ।
कोसीटप्पु वन्यजन्तु आरक्षमा पर्यटक भित्र्याउन कोसी गाउँपालिकाले यस वर्ष पनि विभिन्न कार्यक्रममार्फत् महोत्सव सुरु गरेको हो । महोत्सवमा भारतीय कुस्ती खेलाडीहरुले आफनो कला प्रदर्शन गरेका छन् । यस क्षेत्रमा दंगल कुस्ती मन पराउने दर्शकहरु बढी भएकाले आयोजकले सोमबारदेखि भारतीय खेलाडीहरुलाई बोलाएर महोत्सवमा कुस्ती सुरु गरेको हो ।
दर्शकहरुलाई आनन्द दिनका लागि दंगल कुस्ती सुरु गरेको कोसी गाउँपालिकाका अध्यक्ष ऐयुव अन्सारीले बताएका छन् । यस क्षेत्रको प्रबद्र्धन र विकासका लागि महोत्सवबाट राष्ट्रिय र अन्तर्राष्ट्रिय क्षेत्रमा पहिचानका लागि यसवर्ष पनि महोत्सव सुरु गरेको उनले बताए ।
दंगल कुस्तीका खेलाडीहरुले दर्शकहरुलाई मनोरञ्जन प्रदान गर्ने, हाउभाउ बढी देखाउने र दर्शकले चाहेकोजस्तो उनीहरुले आआफ्नो कला प्रदर्शन गर्ने गरेकाले यस क्षेत्रका जनताले बढी रुचाउने गरेको अध्यक्ष अन्सारीले बताए । महोत्सव एक सत्तासम्म चल्ने आयोजकले जनाएको छ ।
